Америка ташқий ишлар министерлиқиниң баянатчиси хитай һөкүмитини уйғурларға қаритиватқан җинайәтлирини аяқлаштурушқа чақирди

Мухбиримиз ирадә
2021-11-10
Share

Америка ташқий ишлар министирлиқиниң баянатчиси нед прайс хитай һөкүмитини уйғурларға қаритиватқан җинайәтлирини аяқлаштурушқа чақирди.

У "америка йәһудий қирғинчилиқи хатирә музейи" ниң уйғурлар тоғрисидики мәхсус доклатиниң елан қилиниш мунасивити билән юқириқи чақириқни елан қилған болуп, тивиттердики рәсмий һесабида мундақ дегән:

"биз ‹америка йәһудий қирғинчилиқи хатирә музейи' ниң чақириқиға аваз қошимиз. Хитай хәлқ җумһурийити шинҗаңдики уйғурларға вә башқа аз санлиқ милләт әзалириға қаратқан инсанийәткә қарши җинайи қилмишлирини тохтитиши керәк."

Америка ташқий ишлар баянатчиси нед прайс йәнә "йәһудий қирғинчилиқи хатирә музейи" ниң симон-скҗод ирқий қирғинчилиқниң алдини елиш тәтқиқат мәркизи елан қилған доклатни һәмбәһирлигән.

Мәзкур орган 9-ноябир күни "бизни аста-аста йоқатмақчи: хитай һөкүмитиниң уйғурларға қаратқан һуҗуми" мавзулуқ мәхсус доклатини елан қилған. Улар доклатида топланған пакитлар асасида хитай һөкүмитиниң уйғурларға ирқий қирғинчилиқ йүргүзүатқан болуши мумкинликини, уйғурларға қаритиливатқан инсанийәткә қарши җинайәтниң көлими вә дәриҗисиниң илгирикидинму күчәйгәнликини билдүргән.

Ирқий қирғинчилиқниң алдин елиш тәтқиқат мәркизиниң мудири наоми киколер ахбарат йиғинида: "хитай һөкүмити уйғурларниң мәнивий дуняси вә мәдәнийитини йоқ қилишқа урунди, бүгүн биз хитайниң уйғурларни пүтүнләй йоқ қилмақчи болуватқанлиқидин әндишә қиливатимиз," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт