Америка һөкүмити уйғурларға немә қилип берәләйду?

Мухбиримиз әзиз
2021-11-19
Share

Америка һөкүмити тунҗи болуп хитайниң уйғур диярида елип бериватқан зор тутқуни вә сияси бастуруш һәркәтлириниң системилиқ ирқий қирғинчилиқ икәнликини етирап қилғандин кейин, әркин дуняниң бу мәсилидики қаришиға зор тәсир көрсәткән иди. Қирғинчилиқ һәққидики қарарниң елинишиға мас һалда америка һөкүмити бир қатар җаза тәдбирлирини елан қилип, уйғур дияридики қирғинчилиққа җавабкар бир қисим хитай әмәлдарлириға җаза елан қилди. Шуниңдәк уйғур қирғинчилиқиниң бир муһим тәркиби қисми болған "заманиви қуллар әмгики" гә четишлиқ бир қатар мәһсулатларни америка таможнасида мусадирә қилди.

Әмма уйғур дияридики қирғинчилиқниң омумий әһвалиға селиштурғанда, америка һөкүмити һазирчә иҗра қилған қарши тәдбирләр изчил йетәрлик болмиди, дәп қариливатқан болуп, америка һөкүмитиниң бу һәқтә немиләрни қилалиши һәққидики пикирләр йеқинда абдувәли аюб вә йонаһ даймонд имзасидики обзор мақалисида йәнә бир қетим тәкитләнди. "дипломат" гезитиниң 16-өктәбир санида елан қилинған бу һәқтики мақалидә хитай һөкүмитиниң уйғур дияридики қирғинчилиқи әскәртилиш билән биргә, уларниң "инсанийәткә қарши җинайәт" дәп атиливатқан бу зор қирғинчилиқни ташқий дунядин йошуруш үчүн һәр саһәниң ағзини юмдуруш йолида түрлүк пәскәшликләрни қиливатқанлиқи, хитай һөкүмитиниң бу саһәгә созулған "қара қоли" ниң алиқачан муһаҗирәттики уйғур җәмийитигә йетип кәлгәнлики тәпсилий баян қилинған.

Апторлар әнә шу хил реаллиқни әсләп ‍өтүш билән биргә нөвәттики аччиқ реаллиқ алдида америка һөкүмити һеч болмиғанда уйғурларниң панаһлиқ тиләш вә мусапирлиққа илтимас сунуш ишлирини тезлитип биртәрәп қилиш, башқа дөләт һөкүмәтлириниң өз тәвәсидики уйғурларни хитайға өткүзүп беришини чәкләш, уйғур дияридики мәҗбурий әмгәкни вә униңға четишлиқ тәминләш зәнҗирини чәкләш үчүн "уйғур мәҗбурий әмгикини чәкләш қануни" ни тездин мақуллаш, уйғур қирғинчилиқиға четишлиқ барлиқ хитай әмәлдарлириға "магнитиски қануни" бойичә җаза бериш, чәт әлләрдики уйғур өктичилиригә паракәндичилик вә тәһдит селиш билән мәшғул болуватқан хитай әмәлдарлириға "җамал қошуқчиниң қатиллиридин һесап елиш" шәклидә җаза бериш қатарлиқ бәш түрлүк тәклипни суниду.

Мәлум болушичә, нөвәттә ғәрб һөкүмәтлирини "уйғур қирғинчилиқи" ни етирап қилиш һәмдә буниңға қарши техиму күчлүк вә әмәлий болған тәдбирләрни елишқа дәвәт қилиш чақириқлири көпләп оттуриға чиқмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт