Amérika hökümiti Uyghurlargha néme qilip béreleydu?

Muxbirimiz eziz
2021-11-19
Share

Amérika hökümiti tunji bolup xitayning Uyghur diyarida élip bériwatqan zor tutquni we siyasi basturush herketlirining sistémiliq irqiy qirghinchiliq ikenlikini étirap qilghandin kéyin, erkin dunyaning bu mesilidiki qarishigha zor tesir körsetken idi. Qirghinchiliq heqqidiki qararning élinishigha mas halda amérika hökümiti bir qatar jaza tedbirlirini élan qilip, Uyghur diyaridiki qirghinchiliqqa jawabkar bir qisim xitay emeldarlirigha jaza élan qildi. Shuningdek Uyghur qirghinchiliqining bir muhim terkibi qismi bolghan "Zamaniwi qullar emgiki" ge chétishliq bir qatar mehsulatlarni amérika tamozhnasida musadire qildi.

Emma Uyghur diyaridiki qirghinchiliqning omumiy ehwaligha sélishturghanda, amérika hökümiti hazirche ijra qilghan qarshi tedbirler izchil yéterlik bolmidi, dep qariliwatqan bolup, amérika hökümitining bu heqte némilerni qilalishi heqqidiki pikirler yéqinda abduweli ayub we yonah daymond imzasidiki obzor maqalisida yene bir qétim tekitlendi. "Diplomat" gézitining 16-öktebir sanida élan qilin'ghan bu heqtiki maqalide xitay hökümitining Uyghur diyaridiki qirghinchiliqi eskertilish bilen birge, ularning "Insaniyetke qarshi jinayet" dep atiliwatqan bu zor qirghinchiliqni tashqiy dunyadin yoshurush üchün her sahening aghzini yumdurush yolida türlük peskeshliklerni qiliwatqanliqi, xitay hökümitining bu sahege sozulghan "Qara qoli" ning aliqachan muhajirettiki Uyghur jem'iyitige yétip kelgenliki tepsiliy bayan qilin'ghan.

Aptorlar ene shu xil ré'alliqni eslep ‍ötüsh bilen birge nöwettiki achchiq ré'alliq aldida amérika hökümiti héch bolmighanda Uyghurlarning panahliq tilesh we musapirliqqa iltimas sunush ishlirini tézlitip birterep qilish, bashqa dölet hökümetlirining öz tewesidiki Uyghurlarni xitaygha ötküzüp bérishini cheklesh, Uyghur diyaridiki mejburiy emgekni we uninggha chétishliq teminlesh zenjirini cheklesh üchün "Uyghur mejburiy emgikini cheklesh qanuni" ni tézdin maqullash, Uyghur qirghinchiliqigha chétishliq barliq xitay emeldarlirigha "Magnitiski qanuni" boyiche jaza bérish, chet ellerdiki Uyghur öktichilirige parakendichilik we tehdit sélish bilen meshghul boluwatqan xitay emeldarlirigha "Jamal qoshuqchining qatilliridin hésap élish" sheklide jaza bérish qatarliq besh türlük teklipni sunidu.

Melum bolushiche, nöwette gherb hökümetlirini "Uyghur qirghinchiliqi" ni étirap qilish hemde buninggha qarshi téximu küchlük we emeliy bolghan tedbirlerni élishqa dewet qilish chaqiriqliri köplep otturigha chiqmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet