Американиң ташқи ишлар муавин министири намзати: «уйғур районида мусулман тавапгаһлириниң чеқиливатқанлиқиға даир хәвәрләрниң чинлиқида мәсилә йоқ»

2019-11-20
Елхәт
Пикир
Share
Принт

Муавин америка ташқи ишлар министири намзати стефан бейган 20‏-ноябир күни америка кеңәш палатасида гуваһлиқ бәргәндә уйғурлар һәққидә тохтилип, хитайниң уйғур районидики мусулман тавапгаһлирини чеқиватқанлиқиға даир хәвәрләрниң чинлиқида мәсилә йоқлуқини билдүргән.

Президент трамп йеқинда өзиниң шималий корейә ишлириға мәсул мәзкур алаһидә әлчисини америка ташқи ишлар министирлиқиниң муавин министирлиқ намзатлиқиға көрсәткән. Шу мунасивәт билән америка кеңәш палатасиниң ташқи ишлар комитети 20‏-ноябир күни гуваһлиқ йиғини чақирған иди. Стефен бейган юқириқи сөзләрни кеңәш палат азаси корий гарднерниң соалиға җаваб бәргәндә қилған. У, өзиниң «ню-йорк вақти» гезитидә елан қилинған уйғурлар һәққидики мәхпий һөҗҗәткә даир хәвәрни оқуғанлиқи вә униңдин чөчүгәнликини билдүрүп: «шундақла мән йәнә бир һәптә аввал хәвәрләрдә елан қилинған мазар, мәсчит қатарлиқ мусулман тавапгаһлириниң системилиқ йоқитиливатқанлиқиға даир рәсимлик дәлилләрни көрдүм. Мән бу хәвәрләрниң чинлиқиға соал қоюшқа һечқандақ сәвәб йоқ, дәп қараймән» дегән. Униң илгири сүрүшичә, бу һәқтики хәвәрләрдә «қорқунчлуқ һадисиләр» ниң йүз бериватқанлиқи қәйт қилиниватқан болуп, диний вә етник гуруппиларға бу хил нишанлиқ зәрбә бериш қобул қилинмайдикән.

Йиғинда кеңәш палата әзаси корий граднер, «ню-йорк вақти» гезитиниң йеқинда хитайниң уйғурларға тутқан муамилисигә даир кишини чөчүтәрлик һөҗҗәтләрни ашкарилиғанлиқи, стефен бейганниң америка хитайниң уйғурлар, христианлар вә башқа диний, етник гуруппиларға тутқан муамилисигә қарита қандақ қилиши керәк, дәп қарайдиғанлиқини сориғаниди. Лекин, стефен бейган корий гарднерниң «биз йәр шари магнитиский қанунини ишқа селип, бу ишта җавабкарлиқи бар хитай әмәлдарлирини җазалишимзи керәк, дәп қарамсиз?» дегән соалиға «биз әһвалға қарап иш қилимиз» дегән.

Пикирләр (0)
Share
Толуқ бәт