«Вал-ситрит журнили» : «хитайниң шинҗаңдики қилмишлириға қандақ инкас қайтуруш керәк?»

Мухбиримиз ирадә
2019-11-21
Елхәт
Пикир
Share
Принт

Хәлқара хитай һөкүмити уйғур елидә йолға қоюватқан лагер түзүми вә мәҗбурий әмгәкни аяғлаштуруш үчүн ортақ һәрикәт қилишқа чақирилмақта.

Америкадики нопузлуқ истратегийә тәтқиқат органлиридин болған «вилсон мәркизи» ниң тәтқиқатчиси брәдлий җардин 20-ноябир күни «вал-ситрит журнили» да «хитайниң шинҗаңдики қилмишлириға қандақ инкас қайтуруш керәк» мавзусида бир парчә мулаһизә қилип, америка вә ғәрб демократик әллириниң уйғур елидә йүз бериватқан дунядики әң еғир кишилик һоқуқ дәпсәндичиликигә чоқум инкас қайтуруши керәкликини йәнә бир қетим әскәрткән вә буниң йоллири үстидә мулаһизә йүргүзгән.

Аптор мақалидә америка һөкүмити хитайниң уйғурларға қиливатқан зулумиға қарши 28 хитай муәссәсини «қара тизимлик» кә алған болсиму, ялғуз буниң йетәрлик болмайдиғанлиқини баян қилған. У американиң хитайдики ширкәтләргә вә бу сиясәтләрдә баш рол еливатқан хитай әмәлдарлирини җазалаш үчүн «йәр шари магнетиский қануни» ни ишқа селиши керәкликини, буниң һәқиқәтән зор роли болидиғанлиқини билдүргән. У, иккинчи қәдәмдә американиң чоқум бу мәсилидә явропа иттипақидики дөләтләрни өзигә маслишишқа көндүрүши керәкликини әскәрткән.

Аптор мақалидә, америка тәрәп» уйғур елидики лагер сияситигә һәмкарлашқан «, дәп қара тизимликкә алған бир хитай техника ширкити билән германийәниң симен телефон ширкитиниң һәмкарлиқ тохтами имзалиғанлиқини мисал қилип туруп, явропа дөләтлириму американиң җаза тәдбирлирини қоллимиған тәқдирдә ялғуз американиң хитай ширкәтлирини җазалишиниң күчлүк тәсири болмайдиғанлиқини баян қилған. У буниң үчүн хитайға қарши америка вә явропа дөләтлириниң ортақ һәрикәт қилиши, хитайниң өч елиш характерлик тәдбирлиригиму ортақ тақабил туруши керәкликини әскәрткән. Чүнки хитай америка билән һазир сода уруши қиливатқан болғачқа явропадинму иқтисадий зәрбә йийиштин еһтият қилидикән. Шуңа бу арқилиқ хитайниң лагер түзүми вә мәҗбурий әмгәкни тохтутуши үчүн һәқиқий үнүм яратқили болидикән.

Тәтқиқатчи брәдлий җардин мулаһизисиниң ахирида уйғур елидики кризисиниң бу әсирдә инсанлар дуч кәлгән әң зор кишилик һоқуқ риқабити икәнликини әскәртип, униңға сүкүт қилиш башқа дөләтләрдиму охшаш җинайәтләрниң йүз бериши үчүн җасарәт бериду, дегән. У американи хитай яратқан «сақчи дөлити» гә қарши ғәрбтики шериклириниму һәрикәткә кәлтүрүшкә дәвәт қилған.

Пикирләр (0)
Share
Толуқ бәт