Дөләт мәҗлиси әзалири: “хитайниң кишилик һоқуқ дәпсәндичиликигә һәмдәм болушқа болмайду!”

Мухбиримиз әзиз
2022.12.06
Share on WhatsApp
Share on WhatsApp

Америка дөләт мәҗлисиниң әзалиридин майк галлагер (Mike Gallagher), марко рубйо (Marco Rubio), том каттон (Tom Cotton) вә киристофер симис (Chris Smith) қатарлиқлар 5-декабир күни коллектип һалда америка таможна вә чегра мудапиә комитетиниң мувәққәт рәиси трой миллер (Troy Miller) вә америка вәтән бихәтәрлик министирлиқиниң министири алехандро майоркас (Alejandro Mayorkas) ға очуқ мәктуп йоллиди.

Мәктупта улар америка һөкүмити йеқинда мақуллиған “күнтахта орнатқанларға иқтисадий ярдәм пули бериш” һәққидики қанун маддилири, бу қанун бойичә америка базириға импорт қилиниватқан күнтахтиларни орнатқучиларниң иқтисадий ярдәмгә еришиши, шуниңдәк бу һалниң “уйғур мәҗбурий әмгикиниң алдини елиш қануни” ни иҗра қилишқа көрситидиған сәлбий тәсири қатарлиқ мәсилиләрни оттуриға қойди һәмдә өзлириниң бу һәқтики әндишилирини ипадилиди.

Мәктупта ейтилишичә, америка базиридики күнтахтиларниң мутләқ көп қисми хитайдин импорт қилинидиған болуп, буларниң ишләпчиқирилиши уйғур мәҗбурий әмгики арқилиқ әмәлгә ашидикән. Америка һөкүмитиниң күнтахта орнатқанларға иқтисадий ярдәм пули бериши әмәлийәттә мушу санаәт үчүн уйғурларни қул сүпитидә ишлитиватқан хитайни иқтисадий җәһәттин қуввәтләндүрүш болидикән. Йәнә бир яқтин күнтахта ишләпчиқиришта хитайдин башқа чоңрақ мәнбә болмиғачқа америка һөкүмити “мәҗбурий әмгәк мәһсулатлириниң америка тәвәсигә киришини чәкләш” дегән маддини қаттиқ иҗра қилиш һәмдә хитайдин мал әкирмәсликкә кепиллик қилалмиған.

Уларниң очуқ мәктупида бу һәқтики үч чоң соал алаһидә тәкитләнгән һәмдә буниңға 16-декабирдин бурун җаваб бериш тәләп қилинған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.