Dölet mejlisi ezaliri: “Xitayning kishilik hoquq depsendichilikige hemdem bolushqa bolmaydu!”

Muxbirimiz eziz
2022.12.06

Amérika dölet mejlisining ezaliridin mayk gallagér (Mike Gallagher), marko rubyo (Marco Rubio), tom katton (Tom Cotton) we kiristofér simis (Chris Smith) qatarliqlar 5-dékabir küni kolléktip halda amérika tamozhna we chégra mudapi'e komitétining muweqqet re'isi troy millér (Troy Miller) we amérika weten bixeterlik ministirliqining ministiri aléxandro mayorkas (Alejandro Mayorkas) gha ochuq mektup yollidi.

Mektupta ular amérika hökümiti yéqinda maqullighan “Küntaxta ornatqanlargha iqtisadiy yardem puli bérish” heqqidiki qanun maddiliri, bu qanun boyiche amérika bazirigha import qiliniwatqan küntaxtilarni ornatquchilarning iqtisadiy yardemge érishishi, shuningdek bu halning “Uyghur mejburiy emgikining aldini élish qanuni” ni ijra qilishqa körsitidighan selbiy tesiri qatarliq mesililerni otturigha qoydi hemde özlirining bu heqtiki endishilirini ipadilidi.

Mektupta éytilishiche, amérika baziridiki küntaxtilarning mutleq köp qismi xitaydin import qilinidighan bolup, bularning ishlepchiqirilishi Uyghur mejburiy emgiki arqiliq emelge ashidiken. Amérika hökümitining küntaxta ornatqanlargha iqtisadiy yardem puli bérishi emeliyette mushu sana'et üchün Uyghurlarni qul süpitide ishlitiwatqan xitayni iqtisadiy jehettin quwwetlendürüsh bolidiken. Yene bir yaqtin küntaxta ishlepchiqirishta xitaydin bashqa chongraq menbe bolmighachqa amérika hökümiti “Mejburiy emgek mehsulatlirining amérika tewesige kirishini cheklesh” dégen maddini qattiq ijra qilish hemde xitaydin mal ekirmeslikke képillik qilalmighan.

Ularning ochuq mektupida bu heqtiki üch chong so'al alahide tekitlen'gen hemde buninggha 16-dékabirdin burun jawab bérish telep qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.