Amérikaning Uyghurlar mesiliside xitayning teshwiqatlirigha aldanmaydighanliqi tekitlenmekte

Muxbirimiz eziz
2019-12-12
Élxet
Pikir
Share
Print

"Jenubiy xitay etigenlik pochtisi" ning 12-dékabirdiki xewiride éytilishiche, amérika awam palatasi maqullighan "Uyghur kishilik hoquq qanun layihesi" ge reddiye bérish üchün Uyghur aptonom rayonluq hökümetning re'isi shöhret zakir mushu düshenbe küni amérika hökümitini qara chaplashta eyibligen hemde lagérdikilerning alliqachan jem'iyet qoynigha qaytip bolghanliqini tekitligen. Emma chet'ellerdiki köpligen Uyghur muhajirlirining ghayib bolghan uruq-tughqanliri heqqidiki bayanliri bu kishilerning hélihem tutqunda ikenlikini wasitilik halda körsitip béridiken.

Xewerde éytilishiche, amérika awam palatasining bu qanun layihesini maqullishidin kéyin xitay hökümiti "Amérika buninggha bedel töleydu" dégendek bir qatar tehdit xaraktérlik sözlerni qilghan. Emma amérika siyasiy sahesidiki erbablar shunche köp ispatlar hazir bolghan ehwalda amérikaning bu sözlerge perwa qilmaydighanliqini tekitligen. Amérika maliye ministirliqining bir yuqiri derijilik emeldari bu toghrisida söz qilip "Xitayning shinjangdiki zulumliridin bizmu endishige chüshmektimiz" dégen. Yene bir xadim bolsa "Bu ehwalda hökümitimiz muwapiq bolghan bashqiche heriketlernimu oylishidu," dégen.

Nöwette xitay hökümitining lagérlar heqqidiki teshwiqatliri "Térrorluq we esebiylikke qarshi küreshning netijiside üch yildin buyan héchqandaq térrorluq weqesi yüz bermidi" dégen sözlerge merkezleshken bolup, analizchilar buni tenqidlep "Uyghurlarni qamiwélip 'weqe chiqmidi' dep maxtinish emeliyette öz-özini aldashtin bashqa nerse emes," déyishmekte.

Toluq bet