48 Нәпәр дөләт мәҗлиси әзаси трамп һөкүмитини уйғур районидики «инсанлиққа қарши җинайәтләр» гә қарита күчлүк инкас қайтурушқа чақирди

Мухбиримиз әркин
2019-12-13
Елхәт
Пикир
Share
Принт

Америка кеңәш палатаси вә авам палатасиниң 48 нәпәр җумһурийәтчи вә демократчилар партийәсидин болған әзаси америка ташқий ишлар министири майк помпейо, малийә министири стевен минучин, сода министири вилбур русларға мәктуп йезип, хитай һөкүмитиниң шинҗаң уйғур аптоном районидики уйғур вә башқа түркий мусулманлирини кәң көләмлик тутқун қилиши, мәҗбурий әмгәккә селишиға кәскин вә күчлүк инкас қайтурушини тәләп қилған.

Мәктубта «америка қошма штатлири шинҗаң уйғур аптоном районида садир қилиниватқан инсанлиққа қарши җинайәтләргә тақабил турушта әркин дуняға йетәкчилик қилиши керәк. Әгәр ‹һәргиз қайта тәкрарланмисун' дегән сөзниң 21‏-әсирдә бир әһмийити болса, биз дәвримиздә йүз бериватқан әң еғир трагедийәгә инкас қайтурушимиз керәк. Әгәр америка вә америка ширкәтлири һәрикәткә өтүшни рәт қилса яки һәрикәткә өтмисә, бу тарихимиздики бир дағ болуп қалиду,» дейилгән. 

Җумһурийәтчи кеңәш палата әзаси марку рубийо билән демократчи авам палата әзаси җеймис микговернниң башчилиқида йезилған мәзкур мәктубқа марку рубийо, җон корнин, ричард блументал, марша биләкбурн, ангус киң, там каттон, сузан колинис, марк варнер, тим кейин қатарлиқ 28 нәпәр кеңәш палата әзаси, җим микговерн, елиот әнгел, брәд шерман, крест симис, тәд йоху ән вагнер қатарлиқ 20 нәпәр авам палата әзаси имза қойған.

Мәктупта, һөкүмәтниң «магнетискии қануни» ни дәрһал ишқа селиши тәләп қилинип, «биз сизләрни шинҗаң уйғур аптоном районлуқ партком секритари чен чүәнго шундақла хитайниң милләтләр вә дин сияситини түзүш, иҗра қилишта рол ойнаватқан юқири дәриҗилик хитай әмәлдарлириға, җүмлидин хитай компартийәси мәркизий комитети, шинҗаң уйғур аптоном районлуқ бирликсәп бөлүми, сиясий-қанун комитети, дөләт хәвпсизлики комитетлириға қарита ‹магнетискии қануни' ни ишқа селип ембарго йүргүзүшкә чақиримиз. Зор миқдардики дәлилләр чен чүәнгониң йиғивелиш лагерлириниң ачқучлуқ пиланлиғучиси икәнликини ашкарилиған бир пәйттә ‹йәр шари магнетиский қануни' ни йәнә ишқа салмаслиқни кәчүргили болмайду,» дейилгән. 

Бундақ мәктуб трамп һөкүмити әмәлдарлириға бурунму йезилған болсиму, лекин бу мәктубта тунҗи қетим хитай бирликсәп бөлүми вә сиясий-қанун комитетиниң исми тилға елинған. 12‏-Декабир күни йезилған мәзкур мәктуб «уйғур кишилик һоқуқ қанун лайиһәси» кеңәш палатасида авазға қоюлушни күтүп турған мәзгилдә йезилған.

Пикирләр (0)
Share
Толуқ бәт