Amérika prézidénti donald tramp Uyghurlar toghriliq awaz chiqirishqa chaqirildi

Muxbirimiz sada
2018-12-19
Élxet
Pikir
Share
Print

Xitayning Uyghur we bashqa musulman milletlerge yürgüzüwatqan dehshetlik basturushliri xelq'araning diqqet-étibarini qozghawatqan bir peytte, bügün, yeni 19-dékabir küni "Washin'gton pochtisi" gézitide "'qayta yüz bermeydu' déyilgen ishlar qaytidin sinaq qiliniwatidu" serlewhilik tehrirat maqalisi élan qilindi.

Mezkur bash maqalide Uyghurlarning öz wetinide sewebsiz tutup turush lagérlirigha qamiliwatqanliqi, mejburiy emgekke séliniwatqanliqi hemde medeniyet, til jehette assimilyatsiyege uchrawatqanliqidek bir qatar zulumlar ixcham we küchlük ibariler arqiliq toluq échip bérilgen.

Maqalide xitay hökümitining tutup turush lagérlirini atalmish "Kespiy téxnika terbiye mektipi" dep siliqlashturup atiwélish qilmishini tilgha élish arqiliq lagér heqqide guwahliq bergenlerning guwahliq sözlirige asasen, bu xil terbiye mektipining emeliyette bir sistémiliq idiye özgertish orni ikenlikini janliq yorutup bergen.

Maqalide yene xitaydiki kishilik hoquq depsendichilikide asasliq rol oynighan xitay emeldarlar "Yershari magnétskiy qanuni" boyiche jazalan'ghanda shu xil lagér sistémisigha hemdemde bolghanlar üchün bir sawaq bolalaydighanliqini tekitligen.

Mezkur bash maqalide yene amérikining siyasiy sehnisidiki birmunche erbablar Uyghurlar weziyiti heqqide awaz chiqiriwatqan bir peytte amérika prézidénti donald trampning izchil sükütte turuwélishigha qarita so'al qoyulghan. Maqalide ikkinchi dunya urushidin kéyin "Qayta yüz bermeydu" dégen tarixiy wedining bügün xitayda yüz bériwatqanliqi, trampning amérika prézidénti bolush süpiti bilen bu mesilige choqum köngül bölüshi lazimliqi chaqirilghan.

Toluq bet