Уйғур паалийәтчиләр ақ сарайда йәнә бир қетим уйғурларниң тәлипини оттуриға қойди

Вашингтондин мухбиримиз әзиз тәйярлиди
2023.12.20

13-Декабир күни америка дөләт хәвпсизлик кеңиши (NSC) америка тәвәсидики уйғур паалийәтчиләрдин “америка уйғур бирләшмиси” ниң рәиси әлфидар илтәбир, адвокат рәйһан әсәт вә түрмигә қамалған уйғур дохтур гүлшән аббасниң қизи зиба мурат қатарлиқлар билән ақ сарайда мәхсус сөһбәтләшкән.

Әлфидар илтәбирниң радийомизға билдүрүшичә, наһайити достанә кәйпиятта давам қилған бу қетимқи сөһбәттә улар өзлириниң аилә кәчмишлирини мисал қилип туруп, уйғур җәмийити дуч келиватқан зулумниң һазир техиму еғирлаватқанлиқини тәкитлигән; шундақла хитайниң җинайәтлирини хәлқара җинайи ишлар сотиға елип чиқиш, америка тәвәсидики уйғурларниң сиясий панаһлиқ ишлирини һәл қилишни тезлитиш, хитайниң америка вә башқа ғәрб әллиридики уйғурларға созуватқан “қара қоли” ни чәкләш вә уйғурларға тәһдит селишиға хатимә бериш, хитайға техиму көп җаза тәдбирлири қоллиниш, шу қатарда уйғур қирғинчилиқи вә уйғур мәҗбурий әмгикини иҗра қилишқа четишлиқ түрмә башлиқлири қатарлиқ техиму көп хитай әмәлдарлирини җазалаш дегәндәк тәләпләрни оттуриға қойған.

Америка-хитай мунасивитидики тәрәққиятларда көрүлүватқан өзгиришләр түпәйлидин, ақ сарайниң америка тәвәсидики уйғурлар билән бу хил шәкилдә юзтуранә сөһбәтлишип бақмиғанлиқиға узун болғанлиқи мәлум. Бу қетимқи сөһбәт дәсләптә сиртқа ашкарилимаслиқ шәрти билән орунлаштурулған болуп, кейинчә бу һәқтики бәзи тәпсилатларни хәвәр қилишқа болидиғанлиқи уқтурулған.

Мәлум болушичә, дөләт хәвпсизлик кеңиши америка президентиниң хәвпсизлик, һәрбий вә ташқи ишлар мәсилилири бойичә қарар елишидики биринчи мәнбә болуп, ақ сарайниң әң муһим функитсийәлик тармақлиридин бири һесаблинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.