Америка кеңәш палата әзалири хитайниң ички әза йиғивелиш җинайитини тохтитиш қанун лайиһәсини тонуштурди

Мухбиримиз җәвлан
2020-12-21
Share

Коммунист хитай һакимийитиниң инсанийәткә қарши җинайәтлиридин бири ички әза амбири қуруп бибаһа қиммәттики инсан органлирини топлаш вә улардин өз мәнпәәти үчүн пайдилиниш болуп, нәччә он йиллардин бери өлүмгә һөкүм қилинған мәһбусларниң, фалунгуң муритлириниң вә йеқинқи йилларда лагерға соланған уйғурларниң ички әзалирини тирик туруп суғуривелиш җинайити өткүзүп келиватқанлиқи хәлқара кишилик һоқуқ органлири тәрипидин әйблинип келиватқаниди.

Йеқинда америка кеңәш палата әзаси там катин(Tom Cotton), кеңәш палата әзлиридин крис симит(Chris Smith), там сози (Tom Suozzi) қатарлиқлар бирликтә хитайниң тирик мәһбуслардин ички әза йиғивелиш җинайитини тосуш үчүн "ички әзаларни мәҗбурий еливелишни тохтитиш қанун лайиһәси" ни елан қилған.

Там катинниң тор бетидә мәзкур қанун лайиһәси һәққидә ахбарат елан қилинған болуп, униңда мундақ дейилгән: "көплигән испатлар хитай компартийәсиниң мәһбуслар вә етиқадчи кишиләрниң ички әзалирини йиғивалидиғанлиқини көрсәтмәктә. Бу қанун лайиһәси шу җинайәткә қатнашқан хитай компартийәси әзалирини ениқлап бекитиш вә уларни җазалашқа қаритилиду. Хитай һөкүмитиниң бундақ қорқунчлуқ җинайәткә һесаб беридиған вақти кәлди".

Америка кеңәш палата әзаси крис симт мундақ дегән: "көп йиллардин буян, хитай компартийәси мәһбуслар вә аз санлиқ милләт кишилириниң ички әзалирини сетип йәп кәлди. Бүгүн улар йәнила ички әза оғрилиқи вә ички әза содиси қилидиған чоң тәшкилаттур. Хитай коммунистлири бу вәһший қилмишиниң һесабини бериши керәк."

У йәнә бу қанун лайиһәсиниң әһмийити һәққидә тохтилип мундақ дегән: "бизниң бу қанун лайиһәмизгә асасән, америка ташқи ишлар министири "сиясий җинайәтчиләр" вә аз санлиқ милләт кишилирини қурбан қилип ички орган топлиғучилар вә орган әткәсчилирини тәкшүрүп ениқлайду, паш қилиду вә уларни җазалаш үчүн үнүмлүк чәкләш тәдбирлирини қоллиниду. Бу қанун лайиһәси шу хил қәбиһ қилмишни техиму көп ашкарилашқа, буниңға четишлиқ җинайәт горуһлири вә шәхсләрниң сесиқ намини тонутушқа һәмдә кишилик һоқуқни дәпсәндә қилидиған бу қорқунчлуқ җинайәткә хатимә беришкә пайдилиқтур".

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт