Amérika kéngesh palata ezaliri xitayning ichki eza yighiwélish jinayitini toxtitish qanun layihesini tonushturdi

Muxbirimiz jewlan
2020-12-21
Share

Kommunist xitay hakimiyitining insaniyetke qarshi jinayetliridin biri ichki eza ambiri qurup bibaha qimmettiki insan organlirini toplash we ulardin öz menpe'eti üchün paydilinish bolup, nechche on yillardin béri ölümge höküm qilin'ghan mehbuslarning, falun'gung muritlirining we yéqinqi yillarda lagérgha solan'ghan Uyghurlarning ichki ezalirini tirik turup sughuriwélish jinayiti ötküzüp kéliwatqanliqi xelq'ara kishilik hoquq organliri teripidin eyblinip kéliwatqanidi.

Yéqinda amérika kéngesh palata ezasi tam katin(Tom Cotton), kéngesh palata ezliridin kris simit(Chris Smith), tam sozi (Tom Suozzi) qatarliqlar birlikte xitayning tirik mehbuslardin ichki eza yighiwélish jinayitini tosush üchün "Ichki ezalarni mejburiy éliwélishni toxtitish qanun layihesi" ni élan qilghan.

Tam katinning tor bétide mezkur qanun layihesi heqqide axbarat élan qilin'ghan bolup, uningda mundaq déyilgen: "Köpligen ispatlar xitay kompartiyesining mehbuslar we étiqadchi kishilerning ichki ezalirini yighiwalidighanliqini körsetmekte. Bu qanun layihesi shu jinayetke qatnashqan xitay kompartiyesi ezalirini éniqlap békitish we ularni jazalashqa qaritilidu. Xitay hökümitining bundaq qorqunchluq jinayetke hésab béridighan waqti keldi".

Amérika kéngesh palata ezasi kris simt mundaq dégen: "Köp yillardin buyan, xitay kompartiyesi mehbuslar we az sanliq millet kishilirining ichki ezalirini sétip yep keldi. Bügün ular yenila ichki eza oghriliqi we ichki eza sodisi qilidighan chong teshkilattur. Xitay kommunistliri bu wehshiy qilmishining hésabini bérishi kérek."

U yene bu qanun layihesining ehmiyiti heqqide toxtilip mundaq dégen: "Bizning bu qanun layihemizge asasen, amérika tashqi ishlar ministiri "Siyasiy jinayetchiler" we az sanliq millet kishilirini qurban qilip ichki organ toplighuchilar we organ etkeschilirini tekshürüp éniqlaydu, pash qilidu we ularni jazalash üchün ünümlük cheklesh tedbirlirini qollinidu. Bu qanun layihesi shu xil qebih qilmishni téximu köp ashkarilashqa, buninggha chétishliq jinayet goruhliri we shexslerning sésiq namini tonutushqa hemde kishilik hoquqni depsende qilidighan bu qorqunchluq jinayetke xatime bérishke paydiliqtur".

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet