Америкада таҗсиман вирусни қәстән тарқатқанларни "террорлуқ" җинайити билән әйибләшкә болидиғанлиқи җакарланди

Мухбиримиз ирадә
2020-03-26
Share

Америка әдлийә министирлиқи қәстән таҗсиман вирус тарқатқанларниң "террорлуқ" җинайити билән әйиблиниши мумкинликини җакарлиди.

С н н телевизийәсиниң бу һәқтики хәвиридин қариғанда, америка әдлийә министирлиқиниң муавин баш тәптиши җефрей росен 25-март сәйшәнбә күни америкадики һәрқайси қанунни иҗра қилғучи органлар вә адовкатларға язған көрсәтмисидә мундақ дегән:

"таҗсиман вирусни қәстән тарқатқан шәхсләр башқиларни мәқсәтлик һалда юқумландуруш һәрикитидә болғанлиқи үчүн террорлуқ билән әйибләшкә болиду. Бу вирус "биологийилик вакаләтчи" гә аит қанунда бәлгиләнгән бу һәқтики изаһатқа мас келиду. Биз бу корона вирусиниң америкилиқларға қарши қорал сүпитидә ишлитиш тәһдити яки урунушиға һәргиз йол қоймаймиз"

Йеқиндин буян иҗтимаий таратқуларда, бир қисим юқумланғучиларниң йемәкликләргә чүшкүрүш, ишик тутқучлирини ялаш қатарлиқлар арқилиқ қәстән башқиларни юқумландурушқа урунуштәк көрүнүшлири тарқилип зор наразилиқ қозғиғаниди.

CNN Ниң санлиқ мәлуматиға асасланғанда, америкада 25-март күни юқумланғучи сани 64 миңдин ашқан болуп, 900 гә йеқин адәм қаза қилған. Муавин баш тәптиш җефрей росен: "биз бундақ җиддий пәйттә америкалиқларниң һоқуқи вә бихәтәрликини қоғдаш үчүн бар күчимиз билән тиришишимиз керәк." дегән.

Юқиридики көрсәтмидә йәнә, вухәндин тарқалған таҗсиман, йәни корона вируси җиддий вәһимә пәйда қиливатқан бир шараитта, бу вәһимидин пайдилинип қанунсиз кирим қилиш, сахтипәзлик вә алдамчилиқ билән шуғуллиниш, сәһийә хадими қияпитигә киривелип, сахта дора вә сәһийә әслиһәлири сетиш қатарлиқ җинайәтләрниң қаттиқ бир тәрәп қилинидиғанлиқиму тәкитләнди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт