Amérikada tajsiman wirusni qesten tarqatqanlarni "Térrorluq" jinayiti bilen eyibleshke bolidighanliqi jakarlandi

Muxbirimiz irade
2020-03-26
Élxet
Pikir
Share
Print

Amérika edliye ministirliqi qesten tajsiman wirus tarqatqanlarning "Térrorluq" jinayiti bilen eyiblinishi mumkinlikini jakarlidi.

S n n téléwiziyesining bu heqtiki xewiridin qarighanda, amérika edliye ministirliqining mu'awin bash teptishi jéfréy rosén 25-mart seyshenbe küni amérikadiki herqaysi qanunni ijra qilghuchi organlar we adowkatlargha yazghan körsetmiside mundaq dégen:

"Tajsiman wirusni qesten tarqatqan shexsler bashqilarni meqsetlik halda yuqumlandurush herikitide bolghanliqi üchün térrorluq bilen eyibleshke bolidu. Bu wirus "Bi'ologiyilik wakaletchi" ge a'it qanunda belgilen'gen bu heqtiki izahatqa mas kélidu. Biz bu korona wirusining amérikiliqlargha qarshi qoral süpitide ishlitish tehditi yaki urunushigha hergiz yol qoymaymiz"

Yéqindin buyan ijtima'iy taratqularda, bir qisim yuqumlan'ghuchilarning yémekliklerge chüshkürüsh, ishik tutquchlirini yalash qatarliqlar arqiliq qesten bashqilarni yuqumlandurushqa urunushtek körünüshliri tarqilip zor naraziliq qozghighanidi.

CNN Ning sanliq melumatigha asaslan'ghanda, amérikada 25-mart küni yuqumlan'ghuchi sani 64 mingdin ashqan bolup, 900 ge yéqin adem qaza qilghan. Mu'awin bash teptish jéfréy rosén: "Biz bundaq jiddiy peytte amérikaliqlarning hoquqi we bixeterlikini qoghdash üchün bar küchimiz bilen tirishishimiz kérek." dégen.

Yuqiridiki körsetmide yene, wuxendin tarqalghan tajsiman, yeni korona wirusi jiddiy wehime peyda qiliwatqan bir shara'itta, bu wehimidin paydilinip qanunsiz kirim qilish, saxtipezlik we aldamchiliq bilen shughullinish, sehiye xadimi qiyapitige kiriwélip, saxta dora we sehiye esliheliri sétish qatarliq jinayetlerning qattiq bir terep qilinidighanliqimu tekitlendi.

Toluq bet