Amérika istixbarati: amérikada tajsiman wirus heqqide tarqalghan wehimilik saxta uchurlarning keynide xitay

Muxbirimiz irade
2020.04.23

Amérikadiki 6 istixbarat orgini amérikada tajsiman wirus heqqide wehimilik xewerlerning tarqilishida xitayning qoli barliqini bildürgen.

“Nyu-york waqti” gézitining igilishiche, bu yil mart éyining otturilirida amérikadiki milyonlighan kishining téléfonlirigha wirus heqqide wehimilik uchurlar kelgen. Uchurlarda “Amérika prézidénti trampning pat yéqinda döletni pütünley qamal astigha alidighanliqi, shunga kishilerning derhal teyyarliq nerse-kéreklirini toluqlap, teyyarliq körüshi kérekliki” yézilghan. Yene bezi uchurlarda, tramp hökümitining bu qararni qamal mezgilidiki qalaymiqanchiliqlarning aldini alidighan eskerlerni yötkeshni tamamlap bolghan haman élan qilidighanliqi yézilghan.

“Nyu-york waqti” gézitining bildürüshiche, bu uchurlar 48 sa'et ichide amma arisida keng tarqilip, wehime peyda qilghan bolup, aqsaray dölet bixeterlik kéngishi twittér arqiliq bu uchurlarni “Yalghan” dep uqturush chiqarghan.

Amérika istixbarat sahesidiki ismini ashkarilimighan alte emeldar bu saxta uchurlarni xitaylarning signal munberlirini qollinish arqiliq keng tarqatqanliqini éniqlap chiqqanliqini éytqan. Biraq, xizmet mexpiyetliki seweblik uni qandaq éniqlighanliqi heqqide tepsiliy uchur bermigen.

Ularning éytishiche, bu qétimliq weqede saxta uchurlarning biwasite halda amérikaliqlarning qol téléfonlirigha kélishi alahide diqqet qozghaydighan bolup, ilgiri ular bundaq ehwalgha uchrap baqmighaniken. Bu qétimliq weqe amérika istixbarat da'irilirining xitay, rusiye we bashqa döletlerning saxta uchur tarqitishtiki yéngi usulliri üstide tekshürüsh ep bérishigha yol achqan.

Melum bolushiche, xitay yene bir qisim ijtima'iy taratqularda we uchur epliride saxta kimlikler arqiliq hésab échip saxta uchurlarni tarqitidiken, buning bilen emeliyettin bixewer milyonlighan amérikaliqlar bu uchurlarni keng tarqitidiken. Xitay hazir rusiye ilgiri qollan'ghan taktikilarni ülge qilip, amérika jama'iti arisida zor pikir ixtilapi peyda qilishqa tirishmaqtiken.

Xewerde éytilishiche, amérika istixbarat xadimliri hazir xitayning amérikadiki diplomatik wezipidiki kishilerning bundaq saxta uchurlarning tarqilishida roli bar-yoqluqini tekshürmektiken. Amérika xéli burunla xitay diplomatlarni tekshürüshni kücheytken bolup, ötken yili séntebirde amérika tashqi ishlar ministirliqi xitayning amérikada turushluq ikki neper xadimini jasusluq gumani bilen mexpiy qoghlap chiqarghaniken.

Xitay terep bolsa bu heqtiki xewerlerni ret qilghan. Xitay tashqi ishlar bayanatchisi jaw lijiyen 21-aprél künidiki bayanatida bu heqtiki xewerlerning asasiy yoqluqini éytqan.

Bu mesile amérika-xitay arisidiki sürkilishni yenimu kücheytishi mumkinken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.