Köpligen amérikaliqlar xitayni eng chong düshmen dep qaraydiken

“Foks soda xewerliri” torining 16-mart élan qilghan bir xewiride éytilishiche, amérikada el rayini tekshürüshtin chiqqan eng yéngi netije shuni körsetkenki, köpligen amérikaliqlar xitayni eng chong düshmen qaraydiken. Chünki xitaydin taralghan korona wirusi bu ikki döletning munasiwitini ghayet zor derijide yamanlashturuwetken.

Xewerde körsitilishche, 45 pirsent amérikaliq xitayni eng chong tehdit dep qaraydiken. Bu ötken yil shundaq dep qarighan 22 pirsent amérikaliqning ikki hessisige toghra kélidiken. 2019-Yilning axirida xitaydin tarqalghan korona wirusi amérikada 500 mingdin köp ademning jénigha zamin bolghandin kéyin, amérika xelqining xitaygha bolghan nepret we düshmenliki barghanséri küchiyip ketken.

Korona wirusidin bashqa yene, xitayning amérikadin paydilinishnila közligen tashqi sodisi, Uyghurlarni qebhi usulda basturushi, xong kongning aliy aptonomiyesini yoq qilishi we rayonlar ara élip barghan zomigerlik siyasiti amérika hökümiti we amérika xelqining naraziliqini kücheytken.

Analizchilarning qarishiche, baydin hökümiti xitay bilen bolidighan tashqi siyasitide xelq rayini nezerdin saqit qilalmaydiken. Amérika tashqi ishlar ministiri antoni bilinkén “Amérikaning 21-esirde yüzlinidighan eng chong gi'o-siyasiy siniqi xitaygha qandaq taqabil turush؛ xitay hazir iqtisad, diplomatiye, herbiy küch we téxnika jehettin küchlen'gen, biz ümid qilghan dunyawi tertip we qimmet qarashqa éghir tehdit kéliwatqan birdinbir dölet” dep éytqan bolup, xitayning bu tehditini tügitip dunyawi tertipni eslige keltürüsh amérika xelqi we amérika hökümiti üchünmu texirsiz mesile iken.