Җош роген хитай компартийәси бирликсәп бөлүминиң америкадики һәрикәтлирини битчит қилишни тәләп қилди

Мухбиримиз ирадә
2020-06-11
Елхәт
Пикир
Share
Принт

«Вашингтон почтиси» гезитиниң тонулған истон язғучиси җош роген 10-июн күни хитай компартийәси мәркизи бирликсәп бөлүминиң америкадики һәрикитини битчит қилиш һәққидә бир парчә мақалә елан қилди.

Җош роген мақалисидә таҗсиман вирус юқумидин кейин хитай мәркизий бирликсәп бөлүминиң чәтәлләрдики сиңип кириш һәрикитиниң күчлүк диққәт қозғашқа башлиғанлиқини, бурундин тартип мәвҗут болуватқан бу хәвпни әмди йоқитидиған вақит кәлгәнликини әскәрткән.

У мақалисидә «америка вә русийә қатарлиқ чоң дөләтләрниң һәммисиниң ‹юмшақ күч' арқилиқ тәсир көрситиш һәрикәтлири болсиму, бирақ хитай компартийәси мәркизий бирликсәп бөлүми елип бериватқан һәрикәтләр техиму тәшкиллик, техиму кәң даирилик вә йошурун хәвпкә игә,» дәп язған.

Җош рогенниң баян қилишичә, америка дөләт мәҗлисиниң 150 әтрапида җумһурийәтчи әзасидин тәшкилләнгән «җумһурийәтчиләр тәтқиқат комитети» дөләт хәвпсизлик истратегийәсини елан қилидиған болуп, улар хитай компартийәси мәркизи бирликсәп бөлүмидики барлиқ юқири дәриҗилик әмәлдарларға җаза йүргүзүшни тәләп қилидикән. Улар йәнә уйғур ели, тибәт вә хоңкоңлуқларни бастурушқа мәсул әмәлдарларни җазалашниму тәләп қилидикән.

Җош рогенниң баян қилишичә, хитайниң мәркизи бирликсәп бөлүминиң хизмәт вәзиписи мав зедуңдин қалған пикир бойичә изчил һалда «хитай компартийәсигә дост болғанларни хитай компартийәсиниң дүшмәнлиригә зәрбә беришкә сәпәрвәр қилиш» болуп кәлгән болуп, һазир ши җинпиңниң рәһбәрликидә бирликсәп бөлүминиң хизмити йәниму кеңәйтилгән. У чәтәлләрдики сиясий партийәләр, чәтәлләрдики муһаҗир гуруппилар, алий мәктәпләр вә ширкәтләргә тәсир көрситиш, җүмлидин хитай компартийәсиниң мәнпәәтини шу дөләтләрдики органлар билән һәмкарлишиш арқилиқ илгири сүрүш үчүн һәрикәт қилидикән. У хитай мәркизи бирликсәп бөлүминиң мана мушу мәқсәтләр билән америкадики нурғун тәтқиқат органлири билән һәтта ахбарат органлирини пул арқилиқ өзигә қаратқанлиқини әскәрткән.

Җош рогин әмди америка җамаитиниң хитайниң мәркизи бирликсәп бөлүми арқилиқ елип бериватқан сиңип кириш һәрикәтлирини тонуп йетидиған вә уни йоқитидиған вақти кәлгәнликини әскәрткән. У мақалисини төвәндикидәк ахирлаштурған: «хитай мәркизи бирликсәп бөлүми пәйда қилған хирис таҗсиман вирус юқумидин илгирила мәвҗут иди, әмди һәр икки сиясий партийә сиясий мәвқәйимиз немә болушидин қәтийнәзәр, буниңға ортақ һалда қарши турушимиз керәк. Мав зидуң илгири бирликсәп бөлүмини хитайниң ‹сеһирлик қорали' дәп мәдһийилигән икән. Чүнки у бизгә туйдурмай туруп, зәрбә беришни мәқсәт қилған. Мана әмди уни әйибләйдиған вә йоқитидиған вақит кәлди.»

Пикирләр (0)
Share
Толуқ бәт