Amérikaliqlarning xitaygha bolghan köz qarishi nacharlap, tarixtiki eng töwen chekke chüshüp qalghan

“Chikago kéngishi” namliq tetqiqat merkizi teripidin bu yil 6-7-aylarda élip bérilghan ray sinash netijisige qarighanda, köp sandiki amérikaliqlarning xitay heqqidiki köz qarishi nacharliship, tarixtiki eng töwen chekke chüshüp qalghan. Mezkur ray sinash netijisi 24-öktebir küni élan qilin'ghan.

Melum bolushiche, bu orun ray sinashqa qatnashqan amérikaliqlardin xitay heqqidiki köz qarishigha 0-din 100 giche nomur qoyushni telep qilghan bolup, netijide ularning bergen nomuri ottura hésab bilen 26 nomur bolghan. Bu nomur “Chikago kéngishi” 1978-yilidin bashlap élip bériwatqan ray sinash netijiliri ichidiki eng töwen netije bolup hésablinidiken.

“Washin'gton pochtisi” gézitining xewiridin qarighanda, amérikada xitaygha bolghan ishenmeslik dolquni tramp hökümitining soda urushi mezgilide küchiyip, kowid-19 wirusi mezgilide örligen. Bu dolqun yéqinqi ikki yildin buyan ikki döletning dunya sehnisidiki jughrapiyelik we siyasiy mesililerdiki tirkishishliri bilen téximu yuqiri pellige yetken.