"ата юрт пидаийлири" қазақистан ташқий ишлар министириниң лагерларда "қазақ қалмиди" дегән сөзини рәт қилди

Мухбиримиз әркин
2019-10-07
Share

Қазақистандики "ата юрт пидаийлири" намлиқ кишилик һоқуқ тәшкилати 7‏-өктәбир радийомизда баянат елан қилип, қазақистан ташқий ишлар министири мухтәр тилевбәрдиниң уйғур районидики "лагерларда қазақ қалмиди" дегән сөзини рәт қилди.

Мәзкур тәшкилатниң һазирқи рәһбири атабек зат 7‏-өктәбир радийомиз хитай  бөлүмигә бәргән баянатида райондики қазақларни өз ичигә алған мутләқ көп қисим тутқунларниң изчил лагер яки түрмиләрдә тутуп турулуватқанлиқини билдүргән. Униң илгири сүрүшичә, аз сандики бири қисим кишиләр қоюп берилгән тәқдирдиму, лекин уларниң лагер, түрмиләрдики тән җазаси, дора-окул яки ач қелиш, сусиз қелиштәк амиллар сәвәблик ички органлири еғир зәхимлинипла қалмай,бәлки роһий җәһәттин вәйранчилиққа учрап, өзлириниң туғуш иқтидарини пүтүнләй йоқатқан икән.

Атабек зат бу сөзләрни қазақистан ташқий ишлар министири мухтәр тилевбәрдиниң  4‏-өктәбир күни қилған лагерлар һәққидики сөзигә қарита ейтқан. Мухтәр тилевбәрди өткән җүмә күни "хитайниң қайта-тәрбийәләш лагерлирида һечқандақ қазақ қалмиғанлиқи, һәммисиниң қоюп берилгәнлики" ни билдүргән. У йәнә "бу хәвәр әң юқири сәвийәдә дәлилләнгән ишәнчлик учур" дегән иди.

Бирақ атабек затниң билдүрүшичә, хитай һөкүмити аз сандики бир қисим лагерларни тақиған болсиму, лекин мутләқ көп қисми йәнила ишлимәктә икән. У "бу учурни қазақистан ташқий ишлар министирлиқиға хитай тәрәп тәминлигән. Бизниң  "ата юрт пидаийлар" тәшкилати бу учурни сахта учур, дәп қарайду. Нөвәттә, хитайниң  җаза лагерлирида нәччә йүз миң қазақ вә нәччә милйон башқа милләтләр тутуп турулмақта. Биз хитай компартийәси дуня хәлқини, җүмлидин қазақистанни алдаватиду, дәп қараймиз" дегән.

Уйғур аптоном районлуқ һөкүмәтниң рәиси шөһрәт закир бу йил язда бейҗиңда ахбарат йиғини өткүзүп, лагердикиләрниң қоюп берилгәнликини елан қилған. Әмма ғәрбтики демократик дөләтләр вә хәлқара таратқулар лагердикиләрниң қоюп берилгәнликиниң ишәнчлик әмәсликини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт