"Ata yurt pida'iyliri" qazaqistan tashqiy ishlar ministirining lagérlarda "Qazaq qalmidi" dégen sözini ret qildi

Muxbirimiz erkin
2019-10-07
Élxet
Pikir
Share
Print

Qazaqistandiki "Ata yurt pida'iyliri" namliq kishilik hoquq teshkilati 7‏-öktebir radiyomizda bayanat élan qilip, qazaqistan tashqiy ishlar ministiri muxter tiléwberdining Uyghur rayonidiki "Lagérlarda qazaq qalmidi" dégen sözini ret qildi.

Mezkur teshkilatning hazirqi rehbiri atabék zat 7‏-öktebir radiyomiz xitay  bölümige bergen bayanatida rayondiki qazaqlarni öz ichige alghan mutleq köp qisim tutqunlarning izchil lagér yaki türmilerde tutup turuluwatqanliqini bildürgen. Uning ilgiri sürüshiche, az sandiki biri qisim kishiler qoyup bérilgen teqdirdimu, lékin ularning lagér, türmilerdiki ten jazasi, dora-okul yaki ach qélish, susiz qélishtek amillar seweblik ichki organliri éghir zeximlinipla qalmay,belki rohiy jehettin weyranchiliqqa uchrap, özlirining tughush iqtidarini pütünley yoqatqan iken.

Atabék zat bu sözlerni qazaqistan tashqiy ishlar ministiri muxter tiléwberdining  4‏-öktebir küni qilghan lagérlar heqqidiki sözige qarita éytqan. Muxter tiléwberdi ötken jüme küni "Xitayning qayta-terbiyelesh lagérlirida héchqandaq qazaq qalmighanliqi, hemmisining qoyup bérilgenliki" ni bildürgen. U yene "Bu xewer eng yuqiri sewiyede delillen'gen ishenchlik uchur" dégen idi.

Biraq atabék zatning bildürüshiche, xitay hökümiti az sandiki bir qisim lagérlarni taqighan bolsimu, lékin mutleq köp qismi yenila ishlimekte iken. U "Bu uchurni qazaqistan tashqiy ishlar ministirliqigha xitay terep teminligen. Bizning  "ata yurt pida'iylar" teshkilati bu uchurni saxta uchur, dep qaraydu. Nöwette, xitayning  jaza lagérlirida nechche yüz ming qazaq we nechche milyon bashqa milletler tutup turulmaqta. Biz xitay kompartiyesi dunya xelqini, jümlidin qazaqistanni aldawatidu, dep qaraymiz" dégen.

Uyghur aptonom rayonluq hökümetning re'isi shöhret zakir bu yil yazda béyjingda axbarat yighini ötküzüp, lagérdikilerning qoyup bérilgenlikini élan qilghan. Emma gherbtiki démokratik döletler we xelq'ara taratqular lagérdikilerning qoyup bérilgenlikining ishenchlik emeslikini bildürgen idi.

Toluq bet