Муһапизәтчи гезити: «хитай яврупа пуқралириға намайиш қилғанлиқи үчүн тәһдит салмақта»

Мухбиримиз ирадә
2019-10-18
Елхәт
Пикир
Share
Принт

Әнглийәниң «муһапизәтчи» гезити хитай һөкүмитиниң чәтәлләрдики уйғурларға юртидики уруқ-туғқанлири арқилиқ тәһдит қиливатқанлиқини ашкарилиди.

Мәзкур гезит 17-өктәбир күни елан қилған бу һәқтики хәвиридә хитай һөкүмитиниң нөвәттә чәтәлләрдә актип паалийәт қиливатқан уйғурларни уларниң юртидики уруқ-туғқанлириниң бихәтәрликини пәш қилип туруп, җимиқтурушқа, уларни паалийәтлиридин тохтитишқа һәрикәт қиливатқанлиқини баян қилған. 

Бу һәқтә 20 йилдин артуқ вақиттин бери германийәдә яшаватқан вә германийә пуқраси абдуҗелил әмәтниң һекайиси мисал қилинған. Хәвәрдә ейтилишичә, әсли ақсу вилайитидин болған абдуҗелил әмәт германийә парламентида өткүзүлгән гуваһлиқ бериш йиғиниға қатнишип икки күн өткәндин кейин, 3 йилдин бери бир қетимму алақә қилалмиған сиңлисидин бир телефон тапшурувалған. Сиңлииси сөзини авал компартийәни махташ билән башлап, ахири униңдин у йәрдики һәрикәтлирини тохтитишни тәләп қилған. Арқидин телифонни алған хитай сақчи хадими уни агаһландуруп: «сән бу йәрдики туғқанлириңниң бихәтәрлики үчүн германийәдики паалийәтлириңни тохтитишиң керәк» дегән. 

Муһапизәтчи гезити бу һәқтә йәнә, фирансийә, финландийә, шветсийә қатарлиқ башқа дөләтләрдә яшайдиған уйғурларниму зиярәт қилған болуп, уларму охшаш бесимға учриғанлиқини билдүргән. 

Германийә парламент әзаси маргарита баус бу һәқтә юқиридики гезитниң зияритини қобул қилғанда хитайниң бу һәрикитиниң «қобул қилғусиз» дәп көрсәткән вә уйғурларни өзлири турушлуқ җайлардики парламент әзалири билән алақилишишқа үндигән. У шундақла хитай һөкүмитиниң бу һәрикитини нормаллаштурушқа болмайдиғанлиқини, буниң чоқум германийә җамаәтчиликигә билдүрүлүши керәкликини тәкитләп «хитайниң германийәдики пуқраларға тәсир көрситиш, уни қорқутуши һәргизму нормаллаштурулмаслиқи керәк» дегән.

Пикирләр (0)
Share
Толуқ бәт