Muhapizetchi géziti: "Xitay yawrupa puqralirigha namayish qilghanliqi üchün tehdit salmaqta"

Muxbirimiz irade
2019-10-18
Élxet
Pikir
Share
Print

En'gliyening "Muhapizetchi" géziti xitay hökümitining chet'ellerdiki Uyghurlargha yurtidiki uruq-tughqanliri arqiliq tehdit qiliwatqanliqini ashkarilidi.

Mezkur gézit 17-öktebir küni élan qilghan bu heqtiki xewiride xitay hökümitining nöwette chet'ellerde aktip pa'aliyet qiliwatqan Uyghurlarni ularning yurtidiki uruq-tughqanlirining bixeterlikini pesh qilip turup, jimiqturushqa, ularni pa'aliyetliridin toxtitishqa heriket qiliwatqanliqini bayan qilghan. 

Bu heqte 20 yildin artuq waqittin béri gérmaniyede yashawatqan we gérmaniye puqrasi abdujélil emetning hékayisi misal qilin'ghan. Xewerde éytilishiche, esli aqsu wilayitidin bolghan abdujélil emet gérmaniye parlaméntida ötküzülgen guwahliq bérish yighinigha qatniship ikki kün ötkendin kéyin, 3 yildin béri bir qétimmu alaqe qilalmighan singlisidin bir téléfon tapshuruwalghan. Singli'isi sözini awal kompartiyeni maxtash bilen bashlap, axiri uningdin u yerdiki heriketlirini toxtitishni telep qilghan. Arqidin télifonni alghan xitay saqchi xadimi uni agahlandurup: "Sen bu yerdiki tughqanliringning bixeterliki üchün gérmaniyediki pa'aliyetliringni toxtitishing kérek" dégen. 

Muhapizetchi géziti bu heqte yene, firansiye, finlandiye, shwétsiye qatarliq bashqa döletlerde yashaydighan Uyghurlarnimu ziyaret qilghan bolup, ularmu oxshash bésimgha uchrighanliqini bildürgen. 

Gérmaniye parlamént ezasi margarita ba'us bu heqte yuqiridiki gézitning ziyaritini qobul qilghanda xitayning bu herikitining "Qobul qilghusiz" dep körsetken we Uyghurlarni özliri turushluq jaylardiki parlamént ezaliri bilen alaqilishishqa ündigen. U shundaqla xitay hökümitining bu herikitini normallashturushqa bolmaydighanliqini, buning choqum gérmaniye jama'etchilikige bildürülüshi kéreklikini tekitlep "Xitayning gérmaniyediki puqralargha tesir körsitish, uni qorqutushi hergizmu normallashturulmasliqi kérek" dégen.

Toluq bet