Aq sarayning torida Uyghurlar üchün imza toplash herikiti bashlandi

Muxbirimiz erkin
2018-09-07
Élxet
Pikir
Share
Print

Amérika prézidénti turushluq aq sarayning tor békitide 6‏-séntebirdin bashlap, xitayning Uyghur we bashqa az sanliq milletlerni xalighanche tutqun qilishi, ularni xorlishigha qarshi imza toplash herikiti bashlandi.

Mezkur heriketni amérikida uzun yillardin béri Uyghurlarni qollap kéliwatqan amérikiliq pa'aliyetchi jek churchward ependi bashlighan. Uning pilani mushu bir ay 100 ming imza toplashtur. Amérika qanunigha asasen mezkur imza toplash herikitige 30 kün ichide 100 ming adem imza qoysa, amérika hökümitining mezkur mesilini xizmet küntertipige kirgüzüp, jawab bérish mejburiyiti tughulidu.

Jek churchward aq sarayning torida élan qilghan imza toplash herikiti heqqidiki bayanida, amérika fédératsiye hökümitidin "Xitay xelq jumhuriyitining Uyghur aptonom rayonidiki xalighanche tutqun qilish we kishilik hoquqni xorlishigha qarita yéngi siyaset tüzüshi" ni telep qilghan.

Mezkur imza toplash herikiti xitayning Uyghur rayonida 3 milyondek Uyghur we bashqa yerlik xelqlerni yighiwélish lagérlirigha, terbiyelesh merkezlirige qamishi yaki yighiwélishi amérika siyasetchiliri, taratquliri we jama'itining barghanche diqqitini qozghap, tramp hökümitini buninggha qarshi tedbir qollinishqa chaqiriwatqan mezgilde bashlandi.

Amérika awam palatasining stéwén chabot, geriy konolliy qatarliq bir qisim ezaliri jüme küni tashqi ishlar ministiri mayk pompé'ogha mektup yézip, tramp hökümitini xitayning Uyghurlarni basturushi, kishilik hoquqini depsende qilishigha qarshi tedbir qollinishqa chaqirghan idi.

Jek churchward imza toplash heqqidiki bayanida yene, Uyghur, qazaq, qirghiz we bashqa musulman xelqlerning xelq'ara kishilik hoquq ehdinamiliridiki hoquqi depsende qiliniwatqanliqi, xitay hökümitining bir milyon yaki uningdinmu köp kishini terbiyelesh lagérlirigha qalmighanliqi, uning yene qanun-nizamlarni chiqirip, sayahet qilishni, yerlik tili, diniy yighilish we shexsiy ibadetni chekligenlikini bildürgen.

Toluq bet