Ақсарай: “биз хитай билән иқтисад уруши қиливатимиз!”

Узундин буян чәтәлләрдики сода вә тиҗарәт паалийәтлиридә чоң бир чәклимигә учрап бақмиған америка содигәрлири хитай билән болидиған сода муамилисидә зор өзгиришкә дуч келиш алдида турмақтикән. “сиясәт” гезитиниң 20-февралдики обзор мақалисида көрситилиишичә, ақсарай нөвәттә “америка билән хитай иқтисад уруши басқучиға кирди” дәп қаримақта.

Обзорда ейтилишичә, америка дөләт мәҗлиси америка сода саһәсиниң хитай тәвәсидики мәбләғ селиш паалийәтлирини назарәт қилиш, америка дөләт бихәтәрликигә зиян селиш еһтимали болған түрләрни мәни қилиш мәсилисини җиддий ойлашмақтикән. Ақсарай болса америка тәвәликидики мәбләғ арқилиқ хитайда иш башлимақчи болуватқан техика ширкәтлирини тәкшүрүш, нөвәттики “қара тизимлик” ни хитай һәрбий системиси билән алақиси болған барлиқ ширкәтләргә кеңәйтиш тоғрисида бир иҗраийәт буйруқи чиқириш алдида икән.

Обзорда ейтилишичә, бу икки түр рәсмий иҗра қилишқа өткәндә америка билән хитай оттурисидики җиддийлик иқтисад саһәсидә әң юқири пәллигә йетидикән. Америка кеңәш палатасиниң әзаси боб кейсий (Bob Casey) бу һәқтә сөз қилип “биз һазир иқтисад уруши басқучиға өттуқ. Мениңчә биз әмди буниңдин 15-20 йил илгири һечқандақ вайим йемигән ишларни қайтидин көздин кәчүрүп чиқишимиз лазим” дегән.