Ақсу даирилири «қара күчкә, рәзилликкә четишлиқ» кишиләрниң өзини мәлум қилишиға мөһләт бекитип бәрди

Мухбиримиз әркин
2019-04-29
Елхәт
Пикир
Share
Принт

Ақсу вилайитиниң қанун тармақлири йеқинда бирләшмә чиқирип, аталмиш «қара күчләр вә рәзиллик» кә четишлиқ шәхсләрниң өзини мәлум қилишиға мөһләт бекитип бәргән.

«Ақсу гезити» ниң 29‏-апрел хәвәр қилишичә, ақсу вилайәтлик оттура сот, вилайәтлик тәптиш мәһкимиси, җ х идариси вә әдлийә идариси уқтуруш чиқирип, «қара күчләргә вә рәзиллик» кә четишлиқ шәхсләрниң 5‏-айниң 30 күнигичә тәшәббускарлиқ билән мәсилисини тапшуруши, мәсилисини мөһләт ичидә тапшурмиғанларниң яки иқрар қилмиғанларниң еғир җазалинидиғанлиқини тәкитлигән.

Нөвәттә хитай даирилириниң уйғур районида қозғиған «қара күчләр вә рәзилликни түгитиш» долқуни кишиләрни мәсилә тапшурушқа яки башқиларни паш қилишқа мәҗбурлаштәк кәң көләмлик һәрикәткә айлинип, уйғур кишилик һоқуқ тәшкилатлирини әндишигә селип кәлмәктә. Уларниң қаришичә, хитай һөкүмити 2 милйондәк уйғур, қазақ вә башқа мусулман милләтләрни йиғивелиш лагериға қамиған бир мәзгилдә бу һәрикәт, һечқандақ қануни рәсмийәткә таянмиған болуп, у техиму көп уйғурға қамақ җазаси бериши яки уларни лагерларға солишини кәлтүрүп чиқиридикән. Лекин «ақсу гезити» ниң хәвиридә ашкарилинишичә, даириләр «қара күчләр вә рәзиллик» кә четишлиқ шәхсләрниң өзини мәлум қилишини тәләп қилипла қалмай, униңға четишлиқ «күчләрниң уруқ-туғқан, дост-бурадәрлириниң паал түрдә уларға өзини мәлум қилиш һәққидә нәсиһәт қилиши» яки «тәшәббускарлиқ билән дело мәлум қилип, җинайәтчини әкелип бериши» тәләп қилинған. Уқтурушта йәнә, пуқраларниң әдлийә органлирини учур билән тәминлиши тәләп қилинип, бу хил қилмишларға алақидар «қиммити бар йип учи билән тәминлигән, қара, рәзил, күчләрниң җинайитини байқаш, бир тәрәп қилиш, зәрбә бериштә муһим төһпә көрсәткәнләргә мукапат берилидиғанлиқи» билдүрүлгән. Уйғур кишилик һоқуқ тәшкилатлириниң илгири сүрүшичә, хитай һөкүмити тәрипләватқан «қара күч вә рәзиллик» дегән бу уқум интайин мүҗмәл болуп, униңда сиясий, диний ипадиләр билән иҗтимаий қилмишлар өз ара арилаштуруветилгән.

Пикирләр (0)
Share
Толуқ бәт