Aqsu da'iriliri "Qara küchke, rezillikke chétishliq" kishilerning özini melum qilishigha möhlet békitip berdi

Muxbirimiz erkin
2019-04-29
Élxet
Pikir
Share
Print

Aqsu wilayitining qanun tarmaqliri yéqinda birleshme chiqirip, atalmish "Qara küchler we rezillik" ke chétishliq shexslerning özini melum qilishigha möhlet békitip bergen.

"Aqsu géziti" ning 29‏-aprél xewer qilishiche, aqsu wilayetlik ottura sot, wilayetlik teptish mehkimisi, j x idarisi we edliye idarisi uqturush chiqirip, "Qara küchlerge we rezillik" ke chétishliq shexslerning 5‏-ayning 30 künigiche teshebbuskarliq bilen mesilisini tapshurushi, mesilisini möhlet ichide tapshurmighanlarning yaki iqrar qilmighanlarning éghir jazalinidighanliqini tekitligen.

Nöwette xitay da'irilirining Uyghur rayonida qozghighan "Qara küchler we rezillikni tügitish" dolquni kishilerni mesile tapshurushqa yaki bashqilarni pash qilishqa mejburlashtek keng kölemlik heriketke aylinip, Uyghur kishilik hoquq teshkilatlirini endishige sélip kelmekte. Ularning qarishiche, xitay hökümiti 2 milyondek Uyghur, qazaq we bashqa musulman milletlerni yighiwélish lagérigha qamighan bir mezgilde bu heriket, héchqandaq qanuni resmiyetke tayanmighan bolup, u téximu köp Uyghurgha qamaq jazasi bérishi yaki ularni lagérlargha solishini keltürüp chiqiridiken. Lékin "Aqsu géziti" ning xewiride ashkarilinishiche, da'iriler "Qara küchler we rezillik" ke chétishliq shexslerning özini melum qilishini telep qilipla qalmay, uninggha chétishliq "Küchlerning uruq-tughqan, dost-buraderlirining pa'al türde ulargha özini melum qilish heqqide nesihet qilishi" yaki "Teshebbuskarliq bilen délo melum qilip, jinayetchini ekélip bérishi" telep qilin'ghan. Uqturushta yene, puqralarning edliye organlirini uchur bilen teminlishi telep qilinip, bu xil qilmishlargha alaqidar "Qimmiti bar yip uchi bilen teminligen, qara, rezil, küchlerning jinayitini bayqash, bir terep qilish, zerbe bérishte muhim töhpe körsetkenlerge mukapat bérilidighanliqi" bildürülgen. Uyghur kishilik hoquq teshkilatlirining ilgiri sürüshiche, xitay hökümiti teriplewatqan "Qara küch we rezillik" dégen bu uqum intayin müjmel bolup, uningda siyasiy, diniy ipadiler bilen ijtima'iy qilmishlar öz ara arilashturuwétilgen.

Toluq bet