"Shinjangdiki her millet xelqining hoquqta barawerlikining kapaliti" namliq aq tashliq kitabta xitay özining qanunsiz qilmishlirini ashkarilap qoyghan

Muxbirimiz jewlan
2021-07-14
Share

Xitay dölet ishliri kabénti axbarat ishxanisi 14-iyun küni "Shinjangdiki her millet xelqining hoquqta barawerlikining kapaliti" namliq aq tashliq kitab élan qilghan.

Bu kitabta xitay hökümiti "Shinjangdiki az sanliq milletlerning ijtima'iy, siyasiy, iqtisadiy hoquqi, medeniyet hoquqi, ayallar we balilar hoquqi, diniy étiqad erkinliki hoquqining barawerlikini qoghdap kelgenlikini" bablar boyiche bölüp, ayrim-ayrim teshwiq qilghan bolsimu, "Puqralarning hoquq-menpe'etige kapaletlik qilish" babida teminligen uchurlirida, qisqa waqit ichide nurghun ademni tutup sotlighanliqi we késim chiqarghanliqidek gheyri qilmishlirini ashkarilap qoyghan.

Aq tashliq kitabning "Puqralarning hoquq-menpe'etige kapaletlik qilish" qismida mundaq qurlar orun alghan: "Adilliq qanun-tüzümning jénidur. Her millet puqralirini qanunning adilliqidin behrimen qilish üchün 74 seyyare sot, 103 ötkünchi sot, 1645 seyyare höküm chiqirish nuqtisi quruldi we délo bir terep qilish mudditi 21. 6 Kün'ge qisqartildi. 2020-Yil shinjangdiki her derijilik sot mehkimiliri 600 ming 49 déloni qobul qilip, 580 ming 74 délogha höküm chiqardi. Köchme sot, intérnét soti, yiraqtin sotlash, rayon atlap sotlash qatarliq zamaniwi sotlash wasitiliridin aktip paydilinildi".

Közetküchilerning qarishiche, yuqiriqi melumatta déyilgen 600 mingdin köp déloning xitay da'iriliri öz meyliche békitip chiqqan siyasiy délolar bolushi mumkin iken. Yerliktiki xitay sotliri emeliyette hökümetning buyruqini ijra qilidighan orunlar bolup, yuqiridin wezipe chüshkende qanuniy tertip, teptish, adwokat dégenlerni oyliship olturmighan. Yene bir jehettin, bu melumatlar xitay hökümitining yillardin buyan Uyghurlarni qara-qoyuq tutup solap, chaqmaq tézlikide sotlap, türlerge bölüp lagérlargha yaki zawutlargha yollawatqan mezgilidiki sot ehwalini melum jehettin eks ettürüp béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet