Argéntina pirézidénti “Kések döletliri guruhi” gha qatnashmaydighan boldi

Washin'gtondin muxbirimiz erkin teyyarlidi
2023.12.04

Yéqinda argéntina pirézidéntliqigha saylan'ghan xawér miléy (Javier Milei) ning  tashqi ishlar ministiri argéntinaning béyjing yétekchilik qiliwatqan “Kések döletliri guruhi” gha qatnashmaydighanliqini bildürgen.

Xitayning yétekchilikidiki rusiye, hindistan, biraziliye, jenubiy afriqa qatarliq döletlerni öz ichige alghan “Kések döletliri guruhi” xitay teripidin gherb démokratik döletlirige xiris qilish üchün qolliniwatqan bir xelq'ara guruh bolushtek tesirat peyda qilip kéliwatqan idi.

“Amérika awazi” radiyosining xewer qilishiche, argéntinaning bolghusi tashqi ishlar ministiri diyana mondino ötken hepte élan qilghan bu qarar, argéntinaning wezipidin ayrilish aldidiki burunqi hökümetning béyjing bilen yéqinlishish siyasitide jiddiy burulush yasaydighanliqini körsitidiken.

 

Xitay re'isi shi jinping ötken hepte xawér miléygha xet yézip, uning “Kések döletliri guruhi” din ayrilmasliqini iltimas qilghan bolsimu, emma xawér miléyning shining xétige qarimay kések döletliridin ayrilishni qarar qilghanliqi qeyt qilinmaqta.

Xawér miléy pirézidéntliq saylimi mezgilide xitayning siyasiy sistémisini qattiq tenqid qilghan. Melum bolushiche, xitay re'isi shi jinping ötken yili argéntinani shexsen özi “Kések döletliri guruhi” gha qatnishishqa teklip qilghan.

Argéntinani “Kések döletliri guruhi” gha teklip qilish resmiy teklipnamisi mezkur guruhning bu yil 8-ayda jenubiy afriqida ötküzülgen bashliqlar yighinida resmiy sunulghan. Kések döletlirining jenubiy afriqa yighinida argéntinadin sirt, iran, éfiyopiye,, misir, se'udi erebistan, birleshme ereb xelipiliki qatarliq döletlergimu resmiy teklipname sunulghanidi.

Bu qétimliq saylamda argéntinaning burunqi béyjingperes hökümitige qarshi mutleq ghelibige érishken xawér miléy, saylam mezgilide xitay hökümitini “Qatil” yaki erkinlik telep qilghuchilarning péyigha chüshken “Suyiqestchiler” ke oxshatqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.