Xitay hökümiti Uyghur rayonidiki ching sulalisige da'ir qel'e xarabilirini jiddiy rémont qilishqa bashlighan

Muxbirimiz nur'iman
2020-07-15
Élxet
Pikir
Share
Print

Xitay kompartiyesining organ tori bolghan shinxu'a agéntliqining 14-iyul bergen xewirige qarighanda, xitay hökümiti bariköl qazaq aptonom nahiyesidiki 200 yilliq tarixqa ige ching sulalisige a'it qel'e xarabisini qaytidin jiddiy rémont qilishqa bashlighan.

Mezkur xewerge asaslan'ghanda, ötken besh yilda bariköl nahiyelik medeniyet yadikarliqlirini qoghdash tarmaqliri nahiyening maliye meblighidin paydilinip, 1800 métirdin artuq izimu qalmighan sheher sépilini rémont qilghan. Eslidiki manju-xitay sheherchisining öz qiyapitini imkanqeder eslige keltürüsh üchün bariköl nahiyelik hökümet yene déshéngmén, wéychangmén, shüenzémén we gu'angyumén qatarliq nurghun munarlarni qayta yasap chiqqan. Bariköl nahiyesidiki yéngi binalarning égizliki we renggini bir tutash pilanlap, uni menching qel'esining uslubi bilen oxshash halgha keltürgen. Bu qurulush üchün 2014-yildin bashlap peqet nahiye maliyesidin chiqirilghan meblegh 30 milyon yüendin ashqan.

Igilinishiche, yéqindin buyan xitay hökümiti Uyghur rayondiki Uyghurlarning tarixi we medeniyitige da'ir qedimiy izlar, 20-esirdiki ikki qétimliq sherqiy türkistan inqilabigha munasiwetlik xatire qurulushliri we mesjit-jamelerni weyran qilip, uning ornigha xitayning mustemlike tarixini gewdilendüridighan sayahet nuqtilirini qurushqa bashlighan.

2009-Yildin bashlap xitay hökümiti qedimiy qeshqer shehirining konasheher rayonida Uyghurlarning 2 milyon 884 ming 200 kiwadrat métir kölemdiki 29 ming 247 yürüsh ata miras öylirini chiqip tashlap, uning ornigha xitay pasonidiki qurulushlarni bina qilghan.

Toluq bet