Америка авам вә кеңәш палаталирида "тйәнәнмен вәқәси" вә хоңкоң һәққидә қарар лайиһәси сунулди

Мухбиримиз әркин
2020-06-05
Share

Америка авам вә кеңәш палаталириниң бир түркүм әзаси һәр икки палатада "тйәнәнмен вәқәси" ниң 31 йиллиқини хатириләш, хитайниң хоңкоңда әркинлик вә аптономийә вәдисигә хилаплиқ қилғанлиқини тәнқидләш қарар лайиһәси сунған. Қарар лайиһәсидә америка һөкүмитиниң хәлқара иттипақ тәшкиллиши, барлиқ дипломатик вастиларни вә нишанлиқ ембарго қораллирини ишқа селип, хоңкоң хәлқиниң кишилик һоқуқини қоғдиши тәләп қилинған. Мәзкур қарар лайиһәсини авам палатасида кристофер симит билән җәймис микговерн, кеңәш палатасида марко рубио билән җәф мерклей оттуриға қойған.

Авам палата әзаси кристофер симит бу һәқтики баянатида, "бу қарар арқилиқ тйәнәнмен қирғинчилиқини хатириләйдиғанлиқи" ни билдүргән. Авам палата әзаси җеймис микговерн болса, һөкүмәтниң барлиқ дипломатик вастиларни ишқа селип, хоңкоңда қанун вә әркинликни қоғдишини тәләп қилған.

Кеңәш палата әзаси марко рубио бу һәқтики баянатида, "хитай һөкүмити вә компартийәси өз пуқралирини шундақла уйғур вә тибәтләрни изчил системилиқ бастуруп, хоңкоң аптономийәсигә бузғунчилиқ қиливатқан бир вақитта, америка өлгәнләрниң әслимилирини һөрмәтләйду, уларниң қалдурған мирасини сақлап қалиду" дегән.

Кеңәш палата әзаси җәф мерклейниң тәкитлишичә, бу қарар лайиһәси хитай һөкүмитигә "американиң тйәнәнмен мәйданидики қурбанлар вә хоңкоңдики демократийәни яқлиғучилардин тартип, шинҗаңда җазалиниватқан милйонлиған уйғурларғичә әркинликни қоғдиғучилар тәрипидә туридиғанлиқи һәққидә күчлүк сигнал бериди" кән.

Мәлум болушичә, нөвәттә мәзкур қарар лайиһәсини даян файништайин стеф дәйнес, тод йоң, корей граднер, рик скот, җош хавлей, там сози, вики хартләр, бән микадамс қатарлиқ җумһурийәтчи вә демократлар партийәсидин болған кеңәш һәм авам палата әзалири қоллиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт