Америка авам палатасида хитай компартийәсини «җинайи ишлар тәшкилати» дәп елан қилиш һәққидә қанун лайиһәси сунулди

Мухбиримиз әркин
2020-10-05
Share

Америка җумһурийәтчиләр партийәсидин болған авам палата әзаси скот пәрий хитай компартийәсини американиң «хәлқара җинайи ишлар тәшкилатлири тизимлики» гә киргүзүш һәққидә қанун тәклип лайиһәси сунған.

Скот пәрий өзиниң торида елан қилған бу һәқтики баянатида: «бу қанун америка қанун иҗра қилиш органлирини хитай компартийәсиниң яман ғәрәзлик һәрикәтлирини нишан қилиши үчүн истиратегийәлик көрсәтмә билән тәминләйду,» дегән. Униң тәкитлишичә, хитай компартийәсиниң америка әқлий мүлүклирини оғрилиши, америка системисиға тор һуҗуми қилиши, җасуслуқ вә хәлқара фантанил әткәсчилики қатарлиқлар билән шуғуллиниши, униң бу тизимликкә кириши үчүн йетәрлик» икән.

Скот пәрийниң мәзкур қанун лайиһәсини тим буршәт, скот дәсҗарлайс қатарлиқ икки җумһурийәтчи авам палата әзаси қоллиған. Қанун лайиһәсиниң демократлар көп санлиқтики авам палатасида қобул қилиниш-қилинмаслиқи мәлум әмәс. Әмма скот пәрийниң агаһландурушичә, хитай компартийәси өзиниң хәлқара җинайити үчүн чоқум җавабкарлиққа тартилиши, америка қанун иҗра қилиш органлири билән толуқ йүзлишиши керәк икән.

Скот пәрий 1-өктәбир күни вашингтонда өткүзүлгән хитай компартийәсиниң 71 йиллиқ һөкүмранлиқиға қарши туруш намайишида сөз қилип, хитайниң түрлүк дәпсәндичиликлиригә йол қоюлуп кәлгәнлики, лекин буниңға әмди хатимә берилиши керәкликини тәкитлигән. У: «униң җинайи қилмиши етирап қилиниши, пүтүн дуня җамаити американиң башчилиқида буниңға қарши туруши керәк,» дегән.

Мәлум болушичә, қанун лайиһәсидә америкадики җинайи ишлар билән шуғулланған хитай дипломатлириниң кәчүрүм қилиниш һоқуқини бикар қилиш оттуриға қоюлған икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.