Amérika awam palatasida xitay kompartiyesini "Jinayi ishlar teshkilati" dep élan qilish heqqide qanun layihesi sunuldi

Muxbirimiz erkin
2020-10-05
Share

Amérika jumhuriyetchiler partiyesidin bolghan awam palata ezasi skot periy xitay kompartiyesini amérikaning "Xelq'ara jinayi ishlar teshkilatliri tizimliki" ge kirgüzüsh heqqide qanun teklip layihesi sun'ghan.

Skot periy özining torida élan qilghan bu heqtiki bayanatida: "Bu qanun amérika qanun ijra qilish organlirini xitay kompartiyesining yaman gherezlik heriketlirini nishan qilishi üchün istiratégiyelik körsetme bilen teminleydu," dégen. Uning tekitlishiche, xitay kompartiyesining amérika eqliy mülüklirini oghrilishi, amérika sistémisigha tor hujumi qilishi, jasusluq we xelq'ara fantanil etkeschiliki qatarliqlar bilen shughullinishi, uning bu tizimlikke kirishi üchün yéterlik" iken.

Skot periyning mezkur qanun layihesini tim burshet, skot desjarlays qatarliq ikki jumhuriyetchi awam palata ezasi qollighan. Qanun layihesining démokratlar köp sanliqtiki awam palatasida qobul qilinish-qilinmasliqi melum emes. Emma skot periyning agahlandurushiche, xitay kompartiyesi özining xelq'ara jinayiti üchün choqum jawabkarliqqa tartilishi, amérika qanun ijra qilish organliri bilen toluq yüzlishishi kérek iken.

Skot periy 1-öktebir küni washin'gtonda ötküzülgen xitay kompartiyesining 71 yilliq hökümranliqigha qarshi turush namayishida söz qilip, xitayning türlük depsendichiliklirige yol qoyulup kelgenliki, lékin buninggha emdi xatime bérilishi kéreklikini tekitligen. U: "Uning jinayi qilmishi étirap qilinishi, pütün dunya jama'iti amérikaning bashchiliqida buninggha qarshi turushi kérek," dégen.

Melum bolushiche, qanun layiheside amérikadiki jinayi ishlar bilen shughullan'ghan xitay diplomatlirining kechürüm qilinish hoquqini bikar qilish otturigha qoyulghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.