Австралийә әдлийә министири: "австралийә университетлириниң коңзи институти билән болған алақисини тәкшүрүватимиз"

Мухбиримиз әркин
2019-07-26
Share

Австралийә әдлийә министири кристян портер 25‏-июл күни австралийә университетлириниң хитайниң һөкүмәт игидарчилиқидики коңзи институтлири билән болған алақисини тәкшүрүватқанлиқини билдүргән.

Кристян портер бу сөзләрни австралийәдики кувинсланд университетида намайиш қилип хоңкоң намайишчилирини қоллиған шундақла уйғур районидики йиғивелиш лагерлирини тақашни тәләп қилған оқуғучиларниң һуҗумға учраш вәқәсиниң арқисидинла қилған. 24‏-Июл күни кувинсланд университетида хоңкоң намайишчилирини қоллайдиғанлиқи, йиғивелиш лагерлирини тақаш тәләп қилған бир қисим оқуғучилар билән бу мәктәптики бейҗиңпәрәс хитай оқуғучиларниң арисида тоқунуш келип чиққан. Тоқунушқа бейҗиңпәрәс хитай оқуғучилириниң қарши тәрәпкә һуҗум қилиши сәвәб болған.

Австралийә ABC телевизийә қанилиниң хәвиридә илгири сүрүшичә, икки тәрәп мәктәп қорусида 4 саәттәк тиркишип турған болуп, ахири сақчиларниң ариға чүшүши билән тинҗиған. Вәқәдә һечким қолға елинмиған болсиму, лекин бу вәқә австралийә иҗтимаий таратқулирида қаттиқ ғулғула қозғап, хитайниң австралийәдики университетларда пикир әркинликигә қанчилик тәһдит селиватқанлиқи талаш-тартиш қилинған иди.

Австралийә әдлийә министириниң 25‏-июл билдүрүшичә, нөвәттә һөкүмәт 13 австралийә университетиниң коңзи институтлири билән имзалиған келишимлириниң йеқинда мақулланған чәтәлликләрниң австралийә ички ишлириға арилишиш қануниға хилап яки әмәсликини тәкшүрмәктә икән. У: "мән министирлиқимизға барлиқ коңзи институтлири билән университетларниң имзалиған келишимлириниң чәтәл тәсирини ашкарилаш қануниға уйғун яки уйғун әмәсликини тәкшүрүшни буйрудум," дегән.

ABC Ниң хәвиридә қәйт қилинишичә, нөвәттә австралийәдики университетларда 190 миң хитай оқуғучи оқуйдикән. Хәвәрдә бу австралийәдики университетлар үчүн яхши тапавәт болсиму, лекин буниң өз нөвитидә йәнә "икки хил сиясий мәдәнийәт оттурисида җиддийчилик пәйда қиливатқанлиқи" тәкитләнгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт