Awstraliye edliye ministiri: "Awstraliye uniwérsitétlirining kongzi instituti bilen bolghan alaqisini tekshürüwatimiz"

Muxbirimiz erkin
2019-07-26
Share

Awstraliye edliye ministiri kristyan portér 25‏-iyul küni awstraliye uniwérsitétlirining xitayning hökümet igidarchiliqidiki kongzi institutliri bilen bolghan alaqisini tekshürüwatqanliqini bildürgen.

Kristyan portér bu sözlerni awstraliyediki kuwinsland uniwérsitétida namayish qilip xongkong namayishchilirini qollighan shundaqla Uyghur rayonidiki yighiwélish lagérlirini taqashni telep qilghan oqughuchilarning hujumgha uchrash weqesining arqisidinla qilghan. 24‏-Iyul küni kuwinsland uniwérsitétida xongkong namayishchilirini qollaydighanliqi, yighiwélish lagérlirini taqash telep qilghan bir qisim oqughuchilar bilen bu mekteptiki béyjingperes xitay oqughuchilarning arisida toqunush kélip chiqqan. Toqunushqa béyjingperes xitay oqughuchilirining qarshi terepke hujum qilishi seweb bolghan.

Awstraliye ABC téléwiziye qanilining xewiride ilgiri sürüshiche, ikki terep mektep qorusida 4 sa'ettek tirkiship turghan bolup, axiri saqchilarning arigha chüshüshi bilen tinjighan. Weqede héchkim qolgha élinmighan bolsimu, lékin bu weqe awstraliye ijtima'iy taratqulirida qattiq ghulghula qozghap, xitayning awstraliyediki uniwérsitétlarda pikir erkinlikige qanchilik tehdit séliwatqanliqi talash-tartish qilin'ghan idi.

Awstraliye edliye ministirining 25‏-iyul bildürüshiche, nöwette hökümet 13 awstraliye uniwérsitétining kongzi institutliri bilen imzalighan kélishimlirining yéqinda maqullan'ghan chet'elliklerning awstraliye ichki ishlirigha arilishish qanunigha xilap yaki emeslikini tekshürmekte iken. U: "Men ministirliqimizgha barliq kongzi institutliri bilen uniwérsitétlarning imzalighan kélishimlirining chet'el tesirini ashkarilash qanunigha uyghun yaki uyghun emeslikini tekshürüshni buyrudum," dégen.

ABC Ning xewiride qeyt qilinishiche, nöwette awstraliyediki uniwérsitétlarda 190 ming xitay oqughuchi oquydiken. Xewerde bu awstraliyediki uniwérsitétlar üchün yaxshi tapawet bolsimu, lékin buning öz nöwitide yene "Ikki xil siyasiy medeniyet otturisida jiddiychilik peyda qiliwatqanliqi" tekitlen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet