Mutexessisler: “Awstraliye 3 yil ichide xitayning urush xewpige duch kélishi mumkin”

Awstraliyediki bir qisim mutexessisler awstraliyening kelgüsi 3 yil ichidila xitayning urush xewpige duch kélishi mumkinlikini agahlandurghan hemde awstraliyening derhal herbiy hazirliqlirini kücheytishi lazimliqini bildürgen.

“Sidnéy etigenlik xewerchiler géziti” diki xewerde éytilishiche, awstraliye dölet mudapi'e ministirliqining sabiq yuqiri derijilik emeldari pétir jénningni öz ichige alghan 5 neper mutexesss ikki künlük yighindin kéyin élan qilghan “Qizil agahlandurush” namliq doklatida bu xewpni otturigha qoyghaniken.

Ular bu urushning 2026-yilila bolidighanliqini, jümlidin xitayning teywen'ge tajawuz qilishi bilen amérika eskerlirining awstraliyege orunlishidighanliqini, buning bilen xitayning awstraliyening muhim herbiy eslihelirige bashqurulidighan bomba hujum qozghaydighanliqi hemde yene halqiliq ul eslihelirige tor hujumi qilishi mumkinlikini bildürgen.

Mutexessisler awstraliyening bundaq bir hujumgha teyyarliqsizliqini eskertip, awstraliyeni bu haletni derhal özgertishke, herbiy hazirliqlarni jiddiy halda kücheytishke chaqirghan.

Ular doklatida “Yéqinqi nechche on yilliq xatirjemlik dewri emdi tügidi, awstraliyening tarixtiki bayram künliri axirlashti” dégen we awstraliyeni xitay dölet re'isi jinpingning öz dölitining armiyesini téz sür'ette qurup chiqishigha estayidil mu'amile qilishqa agahlandurghan.