Австралийә тинч окяндики арал дөләтләрниң су асти интернет линийәси қурулушини «хуавей» дин тартивалди

Мухбиримиз ирадә
2018-07-12
Елхәт
Пикир
Share
Принт

Ройтерс агентлиқиниң хәвәр қилишичә, тинч окяндики арал дөләтләрдин соломон тақим араллири вә папуа йеңи гивинийәси бирләшмә су асти интернет линийәси қурулуши үчүн бүгүн австралийә һөкүмити билән келишимгә рәсмий имза қойған. Буниң билән хитайниң хуавей ширкитиниң бу қурулушни үстигә елиш пилани битчит болған.

Тинч окяндики соломон тақим араллири вә папуа йеңи гивинийәси су асти интернет линийәси орунлаштуруш вә бир тор бихәтәрлик мәркизи тәсис қилиш қурулушини әслий хитайниң хуавей ширкити һөддигә алмақчи болған. Әмма бу австралийәни қаттиқ биарам қилған. Чүнки хуавей ширкити хитайниң җасуслуқ органлирини учур яки үскүнә тәминләш гумани билән йеқинқи йиллардин буян америка вә австралийә қатарлиқ дөләтләрниң еһтият обйектиға вә назарәт қилиш нуқтисиға айланған бир ширкәт иди.

Униң австралийәгә қошна районлардики бундақ муһим бир қурулушни үстигә елиши австралийәниң дөләт бихәтәрлики үчүн тәһдит дәп қаралғанлиқтин австралийә бу әндишилирини көп қетим юқириқи икки дөләт һөкүмәтлиригә билдүргән вә бу қурулушни австралийә өзи үстигә елишни қарар қилған иди.

Бу йил 6-айда австралийә һөкүмити билән соломон тақим араллири һөкүмити икки тәрәп қошма баянат елан қилип, келишим һасил қилғанлиқини җакарлиған. Австралийә баш министири җулий бишоп әйни чағда мухбирларға қилған сөзидә хуавей ширкитиниң ишәнчсизликидин сөз ачмиған болсиму, әмма соломон араллириниң баш министири австралийәниң а б с агентлиқиға қилған сөзидә өзлириниң хуавей ширкити билән өткән йили түзгән тохтамини австралийәниң әндишиси сәвәблик бикар қилғанлиқини ашкарилиған иди.

Пикирләр (0)
Share
Толуқ бәт