Awstraliye tinch okyandiki aral döletlerning su asti intérnét liniyesi qurulushini "Xu'awéy" din tartiwaldi

Muxbirimiz irade
2018-07-12
Élxet
Pikir
Share
Print

Roytérs agéntliqining xewer qilishiche, tinch okyandiki aral döletlerdin solomon taqim aralliri we papu'a yéngi giwiniyesi birleshme su asti intérnét liniyesi qurulushi üchün bügün awstraliye hökümiti bilen kélishimge resmiy imza qoyghan. Buning bilen xitayning xu'awéy shirkitining bu qurulushni üstige élish pilani bitchit bolghan.

Tinch okyandiki solomon taqim aralliri we papu'a yéngi giwiniyesi su asti intérnét liniyesi orunlashturush we bir tor bixeterlik merkizi tesis qilish qurulushini esliy xitayning xu'awéy shirkiti höddige almaqchi bolghan. Emma bu awstraliyeni qattiq bi'aram qilghan. Chünki xu'awéy shirkiti xitayning jasusluq organlirini uchur yaki üsküne teminlesh gumani bilen yéqinqi yillardin buyan amérika we awstraliye qatarliq döletlerning éhtiyat obyéktigha we nazaret qilish nuqtisigha aylan'ghan bir shirket idi.

Uning awstraliyege qoshna rayonlardiki bundaq muhim bir qurulushni üstige élishi awstraliyening dölet bixeterliki üchün tehdit dep qaralghanliqtin awstraliye bu endishilirini köp qétim yuqiriqi ikki dölet hökümetlirige bildürgen we bu qurulushni awstraliye özi üstige élishni qarar qilghan idi.

Bu yil 6-ayda awstraliye hökümiti bilen solomon taqim aralliri hökümiti ikki terep qoshma bayanat élan qilip, kélishim hasil qilghanliqini jakarlighan. Awstraliye bash ministiri juliy bishop eyni chaghda muxbirlargha qilghan sözide xu'awéy shirkitining ishenchsizlikidin söz achmighan bolsimu, emma solomon arallirining bash ministiri awstraliyening a b s agéntliqigha qilghan sözide özlirining xu'awéy shirkiti bilen ötken yili tüzgen toxtamini awstraliyening endishisi seweblik bikar qilghanliqini ashkarilighan idi.

Toluq bet