Австралийә хитай билән болған кишилик һоқуқ һәмкарлиқиға хатимә бәргән

Мухбиримиз әркин
2019-11-18
Елхәт
Пикир
Share
Принт

Австралийә хитайниң уйғурларға тутқан «қорқунчлуқ» муамилиси, хоңкоң вә хитай кишилик һоқуқ вәзийити сәвәблик хитай билән болған кишилик һоқуқ һәмкарлиқ мунасивитигә хатимә бәргәнликини елан қилди.

Австралийә таратқулириниң хәвәр қилишичә, австралийә ташқи ишлар вә сода министирлиқи 18‏-ноябир хитай билән болған 20 нәччә йиллиқ кишилик һоқуқ һәмкарлиқ мунасивитигә хатимә бәргәнлики, хитайда кишилик һоқуқниң тәрәққиятиға ярдәм бериш мәқситидики 7. 4 Милйон долларлиқ кишилик һоқуқ техника ярдәм программисини тохтатқанлиқини билдүргән. Мәзкур программа 3 йил аввал йолға қоюлған икән.

Австралийәниң мәзкур қарари хитай һөкүмити икки нәпәр австралийә дөләт мәҗлиси әзасиниң бу йил 12‏-айда хитайни зиярәт қилип, бейҗиңда өткүзүлидиған бир йиғинға қатнишишини чәкләп арқидинла елан қилинған. Австралийә таратқулирида, хитайниң либераллар партийәсиниң авам палата әзаси андреу хәсти билән кеңәш палата әзаси җеймис петерсонға виза беришни рәт қилғанлиқи, уларниң кишилик һоқуқ, хоңкоң вә уйғур мәсилисидә хитайни тәнқид қилип келиватқанлиқи илгири сүрүлгән.

«Австралийә гезити» ниң хәвәр қилишичә, андреу хәсти 17‏-ноябир күни өзиниң җеймис петерсон билән «хитайниң австралийәдә өз тәсирини кеңәйтишкә урунуши, шундақла униң шинҗаңда уйғурларниң кишилик һоқуқни дәпсәндә қилишини тәнқидләштин тохтап қалмайдиғанлиқи» ни билдүргән. Шу күни йәнә австралийә ташқи ишлар министири мәриса пейин баянат елан қилип, «ню-йорк вақти гезити» дә елан қилинған хитайниң лагерлар һәққидики мәхпий һөҗҗитидин чөчүгәнликини билдүргәниди.

Мәриса пейин, «шинҗаң һәққидики һөҗҗәтләрдин хәвәр таптим. У, бу йил сентәбирдә елан қилинған чөчүтәрлик видийолардин кейинки йәнә бир һадисә» дегән. У йәнә австралийәниң лагерлар һәққидики әндишилирини изчил оттуриға қоюп келиватқанлиқини тәкитләп, «бу чөчүтәрлик хәвәрләр бүгүн австралийәниң қаришини күчләндүрди. Биз өзимизниң бу җәһәттики әндишимизни қайта тәкитләймиз» дәп көрсәткән. «Ню-йорк вақти гезити» 16‏-ноябир күни хитай һөкүмитиниң уйғурларни кәң көләмлик тутқун қилип, лагерларға қамишиға алақидар 403‏ бәтлик бир мәхпий һөҗҗитини ашкарилап, дуняда зор ғулғула қозғиған иди.

Пикирләр (0)
Share
Толуқ бәт