Awstraliye xitay bilen bolghan kishilik hoquq hemkarliqigha xatime bergen

Muxbirimiz erkin
2019-11-18
Élxet
Pikir
Share
Print

Awstraliye xitayning Uyghurlargha tutqan "Qorqunchluq" mu'amilisi, xongkong we xitay kishilik hoquq weziyiti seweblik xitay bilen bolghan kishilik hoquq hemkarliq munasiwitige xatime bergenlikini élan qildi.

Awstraliye taratqulirining xewer qilishiche, awstraliye tashqi ishlar we soda ministirliqi 18‏-noyabir xitay bilen bolghan 20 nechche yilliq kishilik hoquq hemkarliq munasiwitige xatime bergenliki, xitayda kishilik hoquqning tereqqiyatigha yardem bérish meqsitidiki 7. 4 Milyon dollarliq kishilik hoquq téxnika yardem programmisini toxtatqanliqini bildürgen. Mezkur programma 3 yil awwal yolgha qoyulghan iken.

Awstraliyening mezkur qarari xitay hökümiti ikki neper awstraliye dölet mejlisi ezasining bu yil 12‏-ayda xitayni ziyaret qilip, béyjingda ötküzülidighan bir yighin'gha qatnishishini cheklep arqidinla élan qilin'ghan. Awstraliye taratqulirida, xitayning libérallar partiyesining awam palata ezasi andré'u xesti bilen kéngesh palata ezasi jéymis pétérson'gha wiza bérishni ret qilghanliqi, ularning kishilik hoquq, xongkong we Uyghur mesiliside xitayni tenqid qilip kéliwatqanliqi ilgiri sürülgen.

"Awstraliye géziti" ning xewer qilishiche, andré'u xesti 17‏-noyabir küni özining jéymis pétérson bilen "Xitayning awstraliyede öz tesirini kéngeytishke urunushi, shundaqla uning shinjangda Uyghurlarning kishilik hoquqni depsende qilishini tenqidleshtin toxtap qalmaydighanliqi" ni bildürgen. Shu küni yene awstraliye tashqi ishlar ministiri merisa péyin bayanat élan qilip, "Nyu-york waqti géziti" de élan qilin'ghan xitayning lagérlar heqqidiki mexpiy höjjitidin chöchügenlikini bildürgenidi.

Merisa péyin, "Shinjang heqqidiki höjjetlerdin xewer taptim. U, bu yil séntebirde élan qilin'ghan chöchüterlik widiyolardin kéyinki yene bir hadise" dégen. U yene awstraliyening lagérlar heqqidiki endishilirini izchil otturigha qoyup kéliwatqanliqini tekitlep, "Bu chöchüterlik xewerler bügün awstraliyening qarishini küchlendürdi. Biz özimizning bu jehettiki endishimizni qayta tekitleymiz" dep körsetken. "Nyu-york waqti géziti" 16‏-noyabir küni xitay hökümitining Uyghurlarni keng kölemlik tutqun qilip, lagérlargha qamishigha alaqidar 403‏ betlik bir mexpiy höjjitini ashkarilap, dunyada zor ghulghula qozghighan idi.

Toluq bet