Awstraliye tewelikidiki xitay sodiger “Siyasiy tesir körsitishke urunush” jinayiti bilen sotlandi

Washin'gtondin muxbirimiz eziz teyyarlidi
2023.12.20

“Awstraliye radiyo shirkiti” (ABC) ning 19-dékabirdiki xewiride éytilishiche, awstraliye puqraliqidiki xitay sodiger sanni dong (Sunny Duong) aldinqi küni mélburn sheherlik sotta xitay kompartiyesige wakaliten awstraliye siyasiy sahesige tesir körsitishke urunush jinayiti bilen eyiblen'gen.

Xewerde éytilishiche, sanni dong nöwette awstraliyediki xitay jama'iti arisida eng zor tesirge ige bay sodigerlerning biri bolup, u yillardin buyan awstraliye siyasiy sahesige, jümlidin sabiq köchmenler ishliri ministiri we ma'arip ministiri wezipilirini ötigen alen taj (Alan Tudge) ependige nuqtiliq “Siyasiy tesir körsitish”ke urunup kelgen. 2020-Yili iyunda tajisiman wirusi tüpeylidin mélburn shehiride qamal tedbiri ijra qilin'ghanda, u “Xan jemeti mélburn doxturxanisi” gha 37 ming dollardin köprek pul i'ane qilghan hemde alen taj bilen birlikte i'ane qilish murasimigha qatnashqan.

Sot xadimliri sanni dongning astirttin xitay istixbarat xadimliri bilen qoyuq alaqide bolup kéliwatqanliqi heqqidiki delil-ispatlarni qolgha chüshürgen. Shuningdek uning alen tajgha yéqinlishishidiki eng muhim meqsedning uni kelgüside awstraliyening bash ministiri bolup saylinishi mumkin, dégen perez asasidiki “Aldin'ala tesir körsitish” urunushi ikenlikini otturigha qoyghan. Emma 2020-yilining axiri alen taj ependi katibi bilen bolghan ashnidarchiliq munasiwiti pash bolup qélip, ministirliqtin istépa bergen.

Xewerde éytilishiche, sanni dong sotta özining xitay hökümiti bilen alaqisi barliqini qet'iy ten almighan. Sot xadimliridin patrik dol (Patrick Doyle) bu heqte muxbirlargha söz qilip, “Jawabkarning qilmishi qandaqtur jéyimis bond (James Bond) ning jasusluq filimliridiki shexslerge oxshimaydu. Eksiche u siyasiy tesir körsitishni nishan qilghan” dégen. Nöwette uning on yilliq qamaqqa höküm qilinish éhtimali barliqi herqaysi axbarat wasitiliridin keng yer alghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.