Австралийә билән йеңи зелландийә: "уйғурларниң вәзийитидин қаттиқ әндишә қиливатимиз"

Мухбиримиз әркин
2021-03-23
Share

Австралийә билән йеңи зелландийә һөкүмәтлири 23-март бирләшмә баянат елан қилип, уйғурларниң вәзийитидин қаттиқ әндишә қиливатқанлиқи, явропа иттипақи, әнгилийә, канада вә американиң хитай компартийәсиниң уйғур елидики әмәлдарлириға йүргүзгән җазалаш тәдбирлирини қоллайдиғанлиқини билдүргән.

Баянатта австралийә вә йеңи зелландийә һөкүмәтлириниң бүгүн "шинҗаңдики уйғур вә башқа мусулман аз санлиқ милләтләргә қаритилған еғир кишилик һоқуқ дәпсәндичиликигә аит күнсери көпийиватқан ишәнчилик доклатлардин қаттиқ әндишә қиливатқанлиқи" тәкитләнгән.

Бу язма баянат австралийә ташқий ишлар вә сода министери мариса пейн билән йеңи зелландийә ташқий ишлар министири нанаий махутаниң намида елан қилинған. Баянатта йәнә уйғурларға қаритилған еғир кишилик һоқуқ дәпсәндичиликигә аит "ениқ дәлилләрниң барлиқи" әскәртилип, "австралийә билән йеңи зелландийә канада, явропа ититпақи, әнгилийә вә американиң төнүгүн кечидә елан қилинған имбарго тәдбирлирини қарши алиду. Биз бу дөләтләрниң, җүмлидин пүтүн австралийә вә йеңи зелландийә җамаәтлиридиму мәвҗут болған бу чоңқур әндишиләргә ортақлишимиз," дейилгән.

Австралийә вә йеңи зелландийә һөкүмәтлириниң баянати австралийә парламентиниң авам палатаси 22-март уйғурлар һәққидики бир қарар тәклип лайиһәси муназирә қилғанниң арқисидинла елан қилинди. Бу тәклип лайиһәсини лебираллар партийәсидин болған авам палата әзаси кәвен андревс билән ишчилар партийәсидин болған авам палата әзаси крист һейис сунған болуп, униңда австралийә һөкүмитиниң б д т ға уйғур елида тәкшүрүш елип бериш тоғрисида бесим ишлитиши, "заманиви қуллуқ вә тәминат зәнҗирлиридики мәҗбурий әмгәккә қарши тәдбирләрни елиши" тәләп қилинған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт