Awstraliyelik bir Uyghur hökümetni xitayda tutup qélin'ghan bir yérim yashliq oghlini qutquzushqa chaqirdi

Muxbirimiz erkin
2019-02-20
Élxet
Pikir
Share
Print

Awstraliyelik bir Uyghur awstraliye diplomatlirini xitay da'iriliri teripidin tutup qélinip, lagérgha qamalghan ayali we bir yérim yashliq oghlini qutquzuwélishqa chaqirghan.

Awstraliye axbarat guruhi ABC ning xewer qilishiche, mezkur awstraliye puqrasining xitayda tutup qélin'ghan oghli bir xitay a'ilisige béqiwélishqa bériwétilish xewpige duch kelmekte iken.

Ismi ashkarilanmighan bu kishi 2015‏-yili 10‏-ayda ayali bilen ürümchide tonushup, 2016‏-yili 8‏-ayda nikahlan'ghan. Ular nikahtin kéyin amérikida shérin'ay ötküzgen hem türkiyeni ziyaret qilip, türkiyede turushluq tughqanlirini yoqlap barghan.

Mezkur kishining ABC muxbirigha bildürüshiche, ular türkiyedin qaytishida u awstraliyege mangghan, ayali a'ilisini körüp kélish üchün yurtigha qaytqan. Uning ayali yurtigha qaytqinida hamilidar bolup, 2017‏-yili 8‏-ayning axirlirida közi yorughan. Lékin ayalining közi yorushtin sel burun ularning alaqisi üzülgen.

ABC Ning xewiride bayan qilinishiche, mezkur awstraliye puqrasi ilgiri awstraliye ichki ishlar ministirliqigha iltimas sunup, oghligha awstraliyening puqraliqini bérishni telep qilghan iken. Lékin ichki ishlar ministirliqi uning oghlining awstraliye puqraliqini étirap qilishni ret qilghan iken. Netijide u awstraliye memuri sotigha erz qilghan. Xewerde bayan qilinishiche, memuri sot yéqinda ichki ishlar ministirliqining qararini aghdurup tashlap, uning oghlining awstraliye puqraliqini étirap qilghan.

Awstraliye tashqi ishlar we soda ministirliqining bir emeldari yéqinda awstraliyede turushluq yéshil kartisi bar 17 kishining Uyghur rayonida tutqun qilin'ghanliqi, ularning ichide héchqandaq bir awstraliye puqrasining yoqlighini bildürgen idi.

ABC Ning xewiride bayan qilinishiche, awstraliye tashqi ishlar we soda ministirliqi nöwette "A'ilisi xitaydiki awstraliyelik mezkur kishige diplomatik yardem bériliwatqanliqi", biraq shexsiy mexpiyetlikni közde tutup, bu heqte yenimu ilgirilep uchur bérelmeydighanliqini bildürgen.

Toluq bet