Австралийәдики уйғурлар һөкүмәтни хитайниң җинайитини "ирқий қирғинчилиқ" дәп бекитишкә чақирмақта

Мухбиримиз җәвлан
2021-03-10
Share

Америка, канада, голландийәдә хитайниң уйғурларға йүргүзүп келиватқан җинайити "ирқий қирғинчилиқ" дәп елан қилинғандин кейин, демократик әлләрдики уйғурлар һөкүмәтләрни бу сәпкә қошулушқа чақириш үчүн давамлиқ һәрикәт қилмақта икән.

ABC Хәвәр қанилиниң 10-март бәргән хәвиригә қариғанда, хитайниң уйғурларни мәҗбурий әмгәккә селиш җинайити һәққидә йеңи доклат елан қилинғандин кейин, австралийәдики уйғур җамаити пурсәтни қолдин бәрмәй, австралийә һөкүмитини "ирқий қирғинчилиқ" җинайитини бекитишкә чақириш үчүн давамлиқ паалийәт қилмақта икән. Йиллардин бери намайиш қилип, хитайниң зулумини аңлитип келиватқан австралийә тәңритағ уйғур аяллири җәмийити бу җәһәттә актип рол ойнаватқан болуп, мәзкур җәмийәтниң рәиси рамилә җанишев мухбирниң васитиси арқилиқ австралийә һөкүмитигә хитап қилип мундақ дегән: "милйонлиған адәм йоқап кәтсә, чоң ирқий қирғинчилиқ башқа бир шәкил билән қайта йүз бериватса, биз йәнә қачанғичә хитайдин қорқуп қарап туримиз?"

Австралийә тәңритағ уйғур аяллири җәмийити австралийә һөкүмитини әхлақ, виҗдан билән иш қилип, хитай һөкүмитиниң қәбиһ җинайитигә қарши турушқа чақирған. Рамилә җанишевниң мухбирға билдүрүшичә, австралийә һөкүмити хитайниң иқтисад-сода арқилиқ өч елишидин әнсирәп, бу мәсилидин өзини қачуруп кәлмәктә икән. У йәнә мундақ дегән: "һәр күни дегүдәк бир йеңи доклат чиқиду. Бу йәрдикиләрниң роһи чүшүп кәтти, қәлби яриланди, хамуш яки сәпра болуп кәтти. Буниң ичидә 20 йилдин бери аилисидикилирини көрәлмигәнләр бар, чүнки һечқайсиси вәтәнгә қайталмайду."

Австралийә һөкүмити хитайниң җинайитини "ирқий қирғинчилиқ" дәп җакарлашқа техи қошулмиған болуп, австралийә ташқий ишлар министири марисә пайн австралийә һөкүмитиниң бу җинайәтни аташ мәсилисидә канада, әнгилийәгә охшаш иттипақдашлири билән охшимайдиған усул қоллинидиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт