Awstraliyediki Uyghurlar hökümetni xitayning jinayitini "Irqiy qirghinchiliq" dep békitishke chaqirmaqta

Muxbirimiz jewlan
2021-03-10
Share

Amérika, kanada, gollandiyede xitayning Uyghurlargha yürgüzüp kéliwatqan jinayiti "Irqiy qirghinchiliq" dep élan qilin'ghandin kéyin, démokratik ellerdiki Uyghurlar hökümetlerni bu sepke qoshulushqa chaqirish üchün dawamliq heriket qilmaqta iken.

ABC Xewer qanilining 10-mart bergen xewirige qarighanda, xitayning Uyghurlarni mejburiy emgekke sélish jinayiti heqqide yéngi doklat élan qilin'ghandin kéyin, awstraliyediki Uyghur jama'iti pursetni qoldin bermey, awstraliye hökümitini "Irqiy qirghinchiliq" jinayitini békitishke chaqirish üchün dawamliq pa'aliyet qilmaqta iken. Yillardin béri namayish qilip, xitayning zulumini anglitip kéliwatqan awstraliye tengritagh Uyghur ayalliri jem'iyiti bu jehette aktip rol oynawatqan bolup, mezkur jem'iyetning re'isi ramile janishéw muxbirning wasitisi arqiliq awstraliye hökümitige xitap qilip mundaq dégen: "Milyonlighan adem yoqap ketse, chong irqiy qirghinchiliq bashqa bir shekil bilen qayta yüz bériwatsa, biz yene qachan'ghiche xitaydin qorqup qarap turimiz?"

Awstraliye tengritagh Uyghur ayalliri jem'iyiti awstraliye hökümitini exlaq, wijdan bilen ish qilip, xitay hökümitining qebih jinayitige qarshi turushqa chaqirghan. Ramile janishéwning muxbirgha bildürüshiche, awstraliye hökümiti xitayning iqtisad-soda arqiliq öch élishidin ensirep, bu mesilidin özini qachurup kelmekte iken. U yene mundaq dégen: "Her küni dégüdek bir yéngi doklat chiqidu. Bu yerdikilerning rohi chüshüp ketti, qelbi yarilandi, xamush yaki sepra bolup ketti. Buning ichide 20 yildin béri a'ilisidikilirini körelmigenler bar, chünki héchqaysisi weten'ge qaytalmaydu."

Awstraliye hökümiti xitayning jinayitini "Irqiy qirghinchiliq" dep jakarlashqa téxi qoshulmighan bolup, awstraliye tashqiy ishlar ministiri marise payn awstraliye hökümitining bu jinayetni atash mesiliside kanada, en'giliyege oxshash ittipaqdashliri bilen oxshimaydighan usul qollinidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet