Австралийә қанили хитайниң CGTN вә CCTV қаналлириниң хәвирини беришни тохтатқан

Мухбиримиз әркин
2021-03-12
Share

Австралийә телевизийә қанили SBS кишилик һоқуқ тәшкилатлириниң шикайити билән хитайниң CGTN вә CCTV қаналлириниң хәвәрлирини тарқитишни тохтатқан. Ройтерс агентлиқиниң хәвәр қилишичә, SBS ниң баянатчиси 12-март ройтерсниң мухбириға CCTV вә CGTN программилириниң шәнбә күндин башлап тарқитилмайдиғанлиқи, SBSниң бир кишилик һоқуқ тәшкилати сунған бу қаналлар һәққидики шикайәтни көздин кәчүрүватқанлиқини билдүргән.

SBS Ниң баянатида: "оттуриға қоюлған җиддий әндишә вә алақидар материялларниң мурәккәпликини көздә тутуп, биз бу қаналларни көздин кәчүрүватқан вақитта, чәтәлдин келидиған CCTV вә CGTN ниң хәвәрлирини тарқитишни тохтитип туруши қарар қилдуқ" дейилгән. Буниң алдида әнглийәму CGTN ниң әнглийәдә тарқилишини тохтатқан иди. Мәлум болушичә, австралийәдики "қоғдиғучиларни қоғдаш" кишилик һоқуқ тәшкилати SBS қанилиға хәт йезип, CGTN вә CCTV ниң ахбарат принсипиға хилаплиқ қилип кәлгәнлики, хитай һөкүмитиниң кишилик һоқуқни дәпсәндә қилишиға һәмкарлашқанлиқини шикайәт қилған.

"қоғдиғучиларни қоғдаш тәшкилати" ниң ейтишичә, хитайниң CCTV қанили 2013-йилдин 2020-йилғичә 56 кишини телевизорға чиқирип, мәҗбурий иқрар қилдурған икән. CGTN Қанили хитайниң уйғур елидә "ирқий қирғинчилиқ" қиливатқанлиқини инкар қилиши, чәтәлдики уйғур мусапирлириниң ғайиб болған аилә әзалирини телевизорға чиқирип, хитайниң сияситини мәҗбурий ақлиши, ғәрб таратқулирини вә уйғур мусапирлирини "шинҗаңға төһмәт қилиш" билән әйибләшкә мәҗбурлишида актип рол ойнап кәлгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт