Австралийә ташқи ишлар министири уйғур тутқунлириниң корла ғәрбий вогзалидики син көрүнүшигә инкас билдүрди

Мухбиримиз әркин
2019-09-23
Елхәт
Пикир
Share
Принт

Австралийә ташқи ишлар министири мәрисә пәйин 23‏-сентәбир күни йүзлигән уйғур тутқунлириниң корла пойиз истансисидики син көрүнүшигә инкас билдүрүп, мәзкур син көрүнүшиниң адәмни «қаттиқ биарам қиларлиқ» көрүнүш икәнликини тәкитлигән шундақла хитайни уйғур вә башқа мусулманларни халиғанчә тутқун қилишни тохтитишқа чақирған.

Австралийә ахбарат агентлиқи ABC ниң хәвәр қилишичә, мәрисә пәйин «мән торда тарқалған адәмни қаттиқ биарам қиларлиқ бу син көрүнүшидин хәвәр таптим. Мән илгири австралийәниң шинҗаңдики уйғур вә башқа мусулманларниң кәң көләмлик тутқун қилинишидин туйған әндишисини оттуриға қоюп кәлдим,» дегән. 

Өткән шәнбә күни чәтәл иҗтимаий таратқулирида 600 дәк охшимиған рәңдә мәһбус кийими кийдүрүлгән, чечи чүшүрүлүп, пут-қоли кишәнләнгән уйғур тутқунларниң хитай сақчилириниң қаттиқ назарити астида корла ғәрбий вогзалидин мәхсус пойиз билән башқа җайға елип меңилғанлиқиға даир бир син көрүнүши кәң тарқалған вә дуняда қаттиқ ғулғула қозғиған иди. Австралийә ахбарат агентлиқиниң билдүрүшичә, мәрисә пәйин йәнә «биз хитайни уйғурлар вә башқа мусулманларни халиғанчә тутқун қилишни тохтитишқа изчил чақиримиз. Биз өзимизниң бу әндишисини бурун оттуриға қоюп кәлдуқ. Буниңдин кейинму икки тәрәпниң учришишлирида яки алақидар хәлқара йиғинларда давамлиқ оттуриға қойимиз» дегән. 

Австралийә ахбарат агентлиқиниң хәвиридә қәйт қилинишичә, австралийә истратегийәлик сиясәт институтиниң сүний һәмраһ анализчиси натан русер бошлуқтин тартилған мәзкур син көрүнүшиниң раст икәнликини дәлиллигән. Натан русер, мәзкур син көрүнүшиниң 2018‏-йили апрел яки авғуст айлирида корла ғәрбий пойиз истансисида тартилған болуши мумкинликини билдүргән. Дүмбисигә хитайчә «қәшқәр қамақханиси» дәп хәт йезилған тутқунларниң қәйәргә елип меңилғанлиқи бизгә намәлум. Әмма радиомиз хитай даирилириниң өткән йили 8‏-айдин башлап нурғун уйғур тутқунлирини хитай өлкилиридики түрмиләргә йөткигәнликини дәлиллигән иди.

Пикирләр (0)
Share
Толуқ бәт