Awstraliye tashqi ishlar ministiri Uyghur tutqunlirining korla gherbiy wogzalidiki sin körünüshige inkas bildürdi

Muxbirimiz erkin
2019-09-23
Élxet
Pikir
Share
Print

Awstraliye tashqi ishlar ministiri merise peyin 23‏-séntebir küni yüzligen Uyghur tutqunlirining korla poyiz istansisidiki sin körünüshige inkas bildürüp, mezkur sin körünüshining ademni "Qattiq bi'aram qilarliq" körünüsh ikenlikini tekitligen shundaqla xitayni Uyghur we bashqa musulmanlarni xalighanche tutqun qilishni toxtitishqa chaqirghan.

Awstraliye axbarat agéntliqi ABC ning xewer qilishiche, merise peyin "Men torda tarqalghan ademni qattiq bi'aram qilarliq bu sin körünüshidin xewer taptim. Men ilgiri awstraliyening shinjangdiki Uyghur we bashqa musulmanlarning keng kölemlik tutqun qilinishidin tuyghan endishisini otturigha qoyup keldim," dégen. 

Ötken shenbe küni chet'el ijtima'iy taratqulirida 600 dek oxshimighan rengde mehbus kiyimi kiydürülgen, chéchi chüshürülüp, put-qoli kishenlen'gen Uyghur tutqunlarning xitay saqchilirining qattiq nazariti astida korla gherbiy wogzalidin mexsus poyiz bilen bashqa jaygha élip méngilghanliqigha da'ir bir sin körünüshi keng tarqalghan we dunyada qattiq ghulghula qozghighan idi. Awstraliye axbarat agéntliqining bildürüshiche, merise peyin yene "Biz xitayni Uyghurlar we bashqa musulmanlarni xalighanche tutqun qilishni toxtitishqa izchil chaqirimiz. Biz özimizning bu endishisini burun otturigha qoyup kelduq. Buningdin kéyinmu ikki terepning uchrishishlirida yaki alaqidar xelq'ara yighinlarda dawamliq otturigha qoyimiz" dégen. 

Awstraliye axbarat agéntliqining xewiride qeyt qilinishiche, awstraliye istratégiyelik siyaset institutining sün'iy hemrah analizchisi natan rusér boshluqtin tartilghan mezkur sin körünüshining rast ikenlikini delilligen. Natan rusér, mezkur sin körünüshining 2018‏-yili aprél yaki awghust aylirida korla gherbiy poyiz istansisida tartilghan bolushi mumkinlikini bildürgen. Dümbisige xitayche "Qeshqer qamaqxanisi" dep xet yézilghan tutqunlarning qeyerge élip méngilghanliqi bizge namelum. Emma radi'omiz xitay da'irilirining ötken yili 8‏-aydin bashlap nurghun Uyghur tutqunlirini xitay ölkiliridiki türmilerge yötkigenlikini delilligen idi.

Toluq bet