Awstraliye kabinét ministiri xitayning bir milyon Uyghurning tutqun qilin'ghanliqi "Saxta xewer" dégen sözini ret qildi

Muxbirimiz erkin
2019-12-20
Élxet
Pikir
Share
Print

Awstraliye kabinét ministiri mishiliya kesh xitayning bir milyon Uyghurning tutqun qilin'ghanliqi "Saxta xewer" dégen sözlirini ret qilip, awstraliyening xitayni lagérlardiki bir milyon musulman Uyghurni qoyup bérishke dawamliq chaqiridighanliqini bildürgen. Xitayning awstraliyede turushluq bash elchisi chéng jingyé 19‏-dékabir küni axbarat yighini ötküzüp, xitayning bir milyon Uyghurni lagérlarda tutup turiwatqanliqini ret qilghan. U, buning "Pütünley saxta xewer" ikenlikini ilgiri sürüp, "Shinjangda yüz bériwatqan ishlarning kishilik hoquq we din bilen héchqandaq munasiwiti yoqliqi" ni tekitligen. U, xitayning qilmishini "Térrorluqqa qarshi turush, uning aldini élish herkitini" dégenidi. Lékin, awstraliye alahide axbarat shirkiti SBS ‏ ning xewer qilishiche, mishiliya kesh awstraliye hökümitining bir milyon musulman Uyghurning Uyghur rayonidiki lagérlarda tutup turuliwatqanliqigha ishinidighanliqini bildürgen. U: "Biz bu heqtiki xewerlerning ishenchilik ikenlikige ishinimiz. Bash ministir bilen men her ikkimiz buni bilimiz. Tashqi ishlar ministirimiz awstraliyening endishisini xitayning biwasite, shundaqla ashkare ipadilidi" dégen. Uning qeyt qilishiche, "Xitayning kishilik hoquq mejburiyitige uyghun heriket qilishi, shundaqla Uyghurlarni tutqun qilishqa xatime bérish mesiliside awstraliyening meydani éniq" iken.

Mishiliya kesh xitayning awstraliyediki Uyghurlarni nazaret qilip, ulargha tehdit we parakendichilik séliwatqanliqi ilgiri sürülüwatqan bir mezgilde xitay elchisining sözlirige jawab bergen. Amérikaning awstraliye turushluq bash elchisi ötken hepte xitayning awstraliyediki Uyghurlarni nazaret qiliwatqanliqi we ulargha parakendichilik séliwatqanliqini bildürgenidi.

Toluq bet