Хитайниң чәтәл ахбарат органлирини ахбарат йиғинидин чәклиши тәнқидкә учриди

Мухбиримиз ирадә
2017-10-26
Share

Бүгүн, “хәлқара мухбирларни қоғдаш комитети” баянат елан қилип, хитайниң хәлқарадики ахбарат васитилиригә қойған чәклимисини тәнқид қилди.

Чаршәнбә күни хитай компартийиси мәркизи комитети рәһбәрлик аппаратиниң йеңидин бәлгиләнгән әзалирини тонуштуруш ахбарат елан қилиш йиғини ечилғанда, хитай даирилири бир қисим даңлиқ чәтәл таратқулириниң мухбирлирини йиғин залиға киргүзмигән. Буларниң ичидә “ню-йорк вақти гезити”, б б с хәвәр агентлиқи, “малийә вақти гезити”, “иқтисадшунаслар гезити” вә “муһапизәтчи” қатарлиқ нопузлуқ ахбарат органлириниң мухбирлири бар икән.

“муһапизәтчи” гезитиниң бу һәқтики хәвиридин қариғанда, мәзкур ахбарат йиғиниға мәсул хадим буниңға ениқ бир чүшәнчә бәрмигән, әмма бәзи ахбарат органлириниң буниңға тәклип қилинмиғанлиқини ейтқан. “хитайдики чәтәллик мухбирлар кулуби” бу әһвалға наразилиқ билдүрүп, “хитай һөкүмити яқтурмайдиған хәвәрләрни елан қилған журналистларни бундақ усул арқилиқ җазалаш ахбарат әркинликини еғир дәриҗидә дәпсәндә қилғанлиқтур, ” дегән. “мухбирларни қоғдаш комитети” асия ишлири башлиқи стивен батлер баянатта хитай һөкүмитини мухбирларниң хитайда әркин хизмәт қилишқа тосалғу болмаслиққа чақирған.

Қизиқарлиқи шуки, дунядики нопузлуқ 5 ахбарат оргининиң мухбирлири киргүзүлмигән бу ахбарат елан қилиш йиғинида хитай дөләт рәиси сөз қилип, “биз мухбирларни хитайниң һәммә йәрлиригә берип, хитайни йәниму яхши тонушқа чақиримиз, ” дегән. Хитайда хизмәт қилидиған бир чәтәл ахбаратиниң мухбири тивиттир ториға “ мән ши җинпиңниң бу авазини елип йенимға селивалимән, келәр қетим сақчилар йолумни тосса бу авазни қоюп беримән, ” дәп инкас язған.

Хәлқарадики кишилик һоқуқ органлири тәрипидин елан қилинған доклатлардин қариғанда, хитай чәтәллик мухбирларниң әркин хизмәт қилиши әң қейин дөләтләрниң бири икән. Чәтәллик журналистларниң болупму уйғур ели вә тибәт қатарлиқ җайларға бериши яки у бу җайлар һәққидә бир нәрсә йезиши күчлүк тосқунлуққа учрап кәлмәктә. Фирансийәлик журналист урсула ханим буниң типик мисали.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт